WHO nagpasalamat sa taga Sugbo

CEBU, Philippines - Mapasalamaton kaayo ang World Health Organization (WHO) sa kagamhanan sa lalawigan sa Sugbo gumikan sa kadako sa natampo niini sa kampanya batok sa rabies nga maoy nakapakibra sa gidaghanon sa mga tawong namatay gumikan sa maong sakit dinhi sa lalawigan.

 Si Dr. Alexander Wandeler ang WHO anti-Rabies Expert miduaw kang Gobernador Gwendolyn Garcia   sa Kapitolyo ug mitunol sa maong pasalamat.

Gihimo ni Wandeler ang pagpasalamat ngadto sa gobernador human niya masuta ang epekto sa kampanya sa gobernador batok sa rabies sa mga lungsod nga iyang giduaw dinhi sa lalawigan sulod sa usa ka semana niyang pag-estar dinhi sa Sugbo.

Kauban ni Wandeler sa pagsuroy sa mga lungsod mao si Provincial Veterinarian Mary Rose Vincoy ug didto nasinatian sa opisyal sa WHO ang paningkamot nga gihimo sa kagamhanan sa lalawigan sa pagpakusog sa kampanya batok sa rabies.

Matud pa ni Wandeler nga iyang nasud-ong usab ang pagpakighiusa sa mga katawhan sa kalungsoran sa kampanya batok sa rabies pinaagi sa boluntaryo nilang pagduyog niini.

Ang maong kampanya molungtad hangtod sa 2013 aron masuta ang hingpit nga pagka- ‘rabies free’ ang isla sa Sugbo ug ang tibook Kabisay-an.

Giawhag usab ni Wandeler   ang katawhan nga namuhi og iro nga kinahanglang mahimo silang   responsabli sa ilang binuhi pinaagi sa pagpabakona niini. (BANAT NEWS)