Nagmotor gipusil sa laing nagmotor patay

CEBU, Philippines - Patay ang usa ka giingong sakop sa Alpha Kappa Rho fraternity nga gipusil sa gituohang karibal usab nga sakop sa fraternity nga nagsakay og motorsiklo sa dalan national sa barangay Pitogo, lungsod sa Consolacion ala 1 pasado ang takna sa miaging kaadlawon.

Ang biktima mao si Cloyd delos Angeles, 28, taga barangay Nangka sa nahisgutang lungsod ug ang nagpusil mao ang duha ka wala hiilhing lalaki nga nagsakay og motorsiklo.

Si PO3 Alin Garciano sa Consolacion Police Station nga nahinabi sa Banat News miingon nga nag-angkas ang biktima sa motorsiklo kuyog sa lain pang wala hiilhing mga kauban.

Dugang pa niya nga gisundan ang motorsiklo nga giangkasan sa biktima sa mga gikatahapan gikan sa barangay Poblacion Oriental ug paghidangat sa maong dapit kalit nga gipamusil.

Si Garciano miingon nga ang biktima nga maoy ikatulo nga nag-angkas maoy naigo sa bukobuko nga maoy hinungdan sa pagkahagbong ngadto sa sementadong karsada.

Tungod niini mipasutoy ang kauban niini palayo tungod kay gigukod sila sa mga gikatahapan.

Ang Scene on Crime Operation (SOCO) nga naghimo’g pakisusi sa patay’ng lawas sa biktima nakakuha og usa ka plastic nga may sulod nga gituohang shabu, tinfoil ug kalibre .22 uban sa mga buhing bala niini.

Si Garciano miingon nga dili pa nila matataw ang hinungdan sa maong pagpamusil apan sa ilang kaugalingong pagtuo nga naglambigit gihapon kini sa panagribal sa fraternity.(EIM) (BANAT NEWS)