Mipatay sa nurse sa Banawa sikop

CEBU, Philippines - Nasikop kagahapon sa buntag sa kapolisan ang usa ka ex-convict nga gipasanginlang gun for hire nga mipusil patay sa usa ka nurse sa sitio Kalubihan, Banawa sa barangay Guadalupe siyudad sa Sugbo sa miaging tuig.

Si Estelito Estrada, 40, alyas ‘Lito’, nga taga Banawa   nadakpan sa mga sakop sa Investigation and Detective Management Branch (IDMB) sa Cebu City Police Office (CCPO) didto sa Sun Valley, Banawa nga gipangulohan ni PO3 Cyril Valencia.

Si Chief Insp. Bonifacio Garciano kanhi hepe sa Theft and Robbery Section (TRS) mibutyag sa mga tigbalita nga si Estrada maoy mipusil sa iyang silingang nurse nga si Rey Tuñacao  sa sitio Kalubihan niadtong Oktobre 25, 2010 atol sa barangay ug SK election.

Gawas sa nurse nga iyang gipatay, mitakdo usab ang dagway ni Estrada sa cartographic sketch sa kapolisan nga maoy mipatay usab sa usa ka Insek nga negosyante’g tubig sa barangay Capitol Site ning siyudad sa miaging buwan apan dali kining gipanghimakak ni Estrada.

Si Estrada usab maoy gidudahang tigpanulis sa mga dapit sa Banawa, Guadalupe, Calamba ug mga kasikbit nga barangay. (BANAT NEWS)