Kontrata ni Cordova wala na renewha sa mayor

CEBU, Philippines - Gikonpirmar ni Mayor Michael Rama nga wala niya renewha ang kontrata sa usa ka sinaligan niyang consultant sa seguridad ingon man ang kasamtangang tsirman sa Police Coordinating and Advisory Council (PCAC) nga si Major Romeo Cordova.

Apan nagdumili ang mayor sa pagbutyag sa hinungdan, luyo sa kamatuoran nga suod kaayo niyang higala si Cordova ug gani dako kaayo kini og gikatabang sa iyang kandidatora pagka-mayor sa miaging eleksyon.

Si Cordova daan nang nagserbisyo sukad pa sa panahon ni kanhi mayor ug karon Kongresista Tomas Osmeña apan nawala siya sa puwesto dihang wala mauyoni ni Osmeña ang pipila niya ka pamaagi.

Apan nakabalik ra usab si Cordova sa City Hall sa dihang gihimo siya ni Rama nga officer-in-charge sa Civil Service Unit (CSU) sa City Hall. Karong wala na ma-renew ang iyang kontrata, gidumala na ang CSU sa executive assistant sa mayor nga si Philip Zafra.

Samtang ang PCAC dumalahon sa usa usab ka consultant ni Rama nga si Eugene Elizalde ug naghuwat na lang kini sa pormal nga suwat sa bag-o niya nga designasyon. (BANAT NEWS)