Mopatay sa 2 drug personalities nadakpan

CEBU, Philippines - Duha ka gipasanginlang gun for hire ang nadakpan atol sa checkpoint sa kapulisan ug nakuhaan duha ka high powered nga armas sa miaging alas-11 diha sa barangay Tayud sa lungsod sa Consolacion.

Ang nadakpan mao ang managbilas nga sila si Jessie Berioso, 26 minyo, lumad nga taga Billaba, Ormoc City, Kenneth Camota, 32, nagpuyo sa sitio Magdo-oc sa barangay Cantao-an sa dakbayan sa Naga.

Si Camota nakuhaan og Armscor .45 nga kalibre sa armas, dunay usa ka magazine ug pito ka buhing bala, silencer, usa ka pakete nga gidudahang shabu, samtang si Berioso nakuhaan usab og .357 Magnum Revolver nga may lima ka buhing bala, duha ka cellphone ug Suzuki Raider 150 nga gipanag-iya ni Camota.

Ang duha nadakpan sa checkpoint sa kapulisan sa lungsod sa Consolacion pinangulohan sa hepe niini nga si Sr. Insp. Wilson Parilla.

Matud ni Parilla sa ilang pagsusi sa cellphone ni Camota dunay text messages niini nga nagsugo kanilang dunay ipapatay nga duha ka tawo nga gidudahang mga drug personality sa dakbayan sa Sugbu ug Mandaue karong semanaha.

Gisusi na karon sa kapolisan ang maong giingong duha ka drug personality nga ‘target.’ Giingong wala makabayad sa illegal nga drugas ang usa sa target, aduna pay laing target nga gibutyag ang duha apan didto sa Ormoc City. (BANAT NEWS)