CEBU, Philippines - Gipagawas na kagahapon sa alas 2:00 sa hapon sa korte ang warrant of arrest sa kasong kidnapping with homicide batok nila ni Bella Ruby Santos ug Ian Charles Griffiths.
Base sa Balitang Bisdak ang korte wala motugot nga makapiyansa si Santos ug Griffiths alang sa ilang temporaryong kagawasan kalabot sa pagsignit ug pagpatay kang Ellah Joy Pique niadtong bulan sa Pebrero.
Si Atty. Inocencio Dela Cerna, abogado sa Criminal Investigation and Detection Group mihagit kang Santos nga mopakita ug pamatud-ang inosente kini ug ang iyang uyab. Matud ni Dela Cerna nga andam sila sa paghatag sa ilang serbisyo kung gikinahanglan gyud kini bisan og duna nay pribadong mga abogado ug panel sa mga prosecutor nga naghupot sa kaso.
Si Dela Cerna nagkanayon usab nga gusto na nilang ma-implementar ang warrant of arrest batok sa duha ka mga akusado aron masugdan na ang pormal nga hearing sa kaso.
Gibutyag usab ni Dela Cerna nga posibleng nagtigom na ang task force alang sa ilang plano sa pag-implementar sa warrant of arrest.
Si Regional Trial Court (RTC) Judge Ester Veloso sa Branch 6 maoy mipagawas sa warrant of arrest tungod kay adunay probable cause nga nakita ang korte aron husayon ang maong kaso.
Samtang gi-defer ni Veloso ang pagdungog sa very urgent motion nga giduso sa Children’s Legal Bureau (CLB) nga naghangyo sa korte nga mo-isyu og hold-departure order batok kang Santos.
Matud ni Veloso nga kuwang sa mga rekisitos ang mosyon nga giduso sa mga abogado sa CLB nga sila si Joann Saniel-Amit, Noemi Abarientos ug Joann Pabriga.
Si Regional State Prosecutor Fernando Gubalane ang migama sa panel sa mga prosecutor nga mo-prosecute sa maong kaso ug kini pangulohan ni Prosecutor Patronio Elesterio. (BANAT NEWS)