Magtutudlo gi-warningan ni Gwen
CEBU, Philippines - Gipasidan-an ni Gobernador Gwendolyn Garcia ang mga magtutudlo ilabi na sa mga publikong tulunghaan nga dili manapat sa ilang mga tinun-an.
Kini human masayri sa gobernador ang kaso sa usa ka magtutudlo sa Manggako Elementary School sa lungsod sa Ginatilan kinsa nanagmal sa iyang 6 anyos nga tinun-an.
Nasayran sa gobernador nga gipusposan og silhig sa magtutudlo nga si Joselita Lopez, Grade 1 class adviser sa maong eskuylahan ang ulo sa bata busa nasamad kini nga may unom ka tinahian ang gitas-on sa maong samad.
Apan, nangatarungan si Lopez nga matud pa wala niya pusposi og silhig ang bata, kundi naigo lang kini dihang mibanda ang silhig sa bongbong nga iyang gisalibay ug didto motugpa sa bagolbagol sa biktima.
Mipasalig ang gobernador nga dili niya tugotang molabay ang maong issue nga dili kapahamtangan og silot ang magtutudlo nga hingtungdan.
Gani, iyang giawhag si DepEd District Superintendent sa Ginatilan sa pagsumiter og report bahin sa maong insidente.
Sumala sa balaod, gidid-an si bisan kinsang magtutudlo sa pagpanapat sa iyang mga tinun-an.
Mismo ang DepEd kusganong midili sa mga magtutudlo pagpaningka sa mga tinun-an kung sila mamadlong sa mga bata. Gipasalig usab sa gobernador nga tabangan niya ang biktima sa mga panginahanglan sa tambal niini sa samad sa iyang ulo. (BANATNEWS)
- Latest
- Trending
