Mipusil sa polis dakpan na

CEBU, Philippines -  Nadakpan na sa kapolisan ang suspetsado nga mipusil sa miaging buwan kang PO1 Antonio Icalina sa barangay Langtad, dakbayan sa Naga niadtong Domingo sa gabii.

Ang suspek nailhan nga si Edwin “Liki” Embolodi, 26, kinsa didto hidakpi sa sitio Mohon, barangay Langtad sa maong dakbayan.

Ang mga sakop sa Provincial Intelligence Branch (PIB) sa Cebu Provincial Police Office (CPPO) nga gipangulohan ni Supt. Rodolfo Albotra kinsa mipahigayon og buy bust operation sa maong lugar maoy nakasikop kang Embolodi.

Gawas kang Embolodi, nasikop usab sila si Carmelito Villarin, 26; Romaldo Tangke, 19; Alimar Tabucal, 18; Genesis Cantina, 21; ug Warren Tabucal, 24, pulos residente sa maong lugar, kinsa naaktohang nanuyop og shabu sulod sa farm sa manokan nga gipanag-iya ni Embolodi.

Nakuha nga ebidensya gikan kang Embolodi mao ang upat ka dagkong pakete ug pito ka medium nga pakete sa gituohang ang sulod shabu nga nagkantidad og P10,000; duha ka cellular phone; a Para Ordnance caliber .45 pistol; 1 magazine; nga adunay 11 ka bala, mga kagamitan sa pag-repack ug pagsuyop og shabu ug P6,200 cash nga gituohang halin sa shabu ug usa ka P500 nga ‘marked money.’

Si Embolodi mitug-an sa kapolisan nga siya maoy mituhod pagpusil kang Icalina aron mahunong ang pagpangolekta niini ug kuwarta gikan kanila.

“Iyang gibuhat sige og haras unya mangayo og kwarta kato ako patagam ra to niya tungod sa akong kalagot,” matud pang Embolodi.

Si Icalina giingong mangolekta og kuwarta gikan sa mga drug pusher sa maong lugar matag adlaw’ng Biyernes ug Sabado ug makakolekta siya og tag P600 ang adlaw.

Kahinumdoman nga kaniadtong May 21, ning tuiga si Icalina napalgang samdan sa duha niya ka tuhod sa gamay’ng dalan duol sa highway ug nagkamang sa gibana-banang 130 feet paingon sa karsada.

Nasuta sa imbestigasyon sa kapolisan sa dakbayan sa Naga nga si Icalina gitabangan og kulata sa dili mominus lima ka tawo ug usa niini maoy mikuha sa iyang armas ug maoy gigamit pagpusil sa iyang duha ka tuhod.

Si Embolodi gikatakdang pasakaan og tukmang kaso sa kapolisan gawas sa frustrated homicide gumikan sa pagpusil niya kang Icalina.(WC)  (BANATNEWS)