Nagduwa sa internetan gipatay

CEBU, Philippines - Patay ang usa ka lalaking nagduwa og computer games sulod sa usa ka internetan human gisulod ug gipusil sa usa ka hubog niadtong Domingo sa alas-4 sa hapon diha sa sitio Bugnay 2, Lutaw-lutaw sa barangay Labangon siyudad sa Sugbu.

Ang biktima giila sa kapulisan nga mao si Marlon Generalao, 31, pintor sa usa ka export products ug nagpuyo sa 226 Cogon A. Lopez sa barangay Labangon.

Samtang ang suspek giila sa kapulisan nga mao si Carlito Barbon Jr., 19, taga sitio Lutaw-lutaw.

Sa pasiunang imbestigasyon ni SPO4 Alex Dacua, PO2 Edario Manatad, PO2 Michael Codaste ug PO2 Leroy Baguio sa Homicide Section nagduwa og computer ang biktima dihang kalit lang misulod ang suspek ug sa walay igong hinungdan gipusil kini duha ka higayon.

Si Generalao nahiagom og usa ka samad pinusilan sa walang bahin sa iyang lawas ug gidali pagdala nila Greggy Pelayo ug ginganlan og ‘Anton’ sa Cebu Doctors Hospital apan gideklarar nga dead on arrival.

Human sa hitabo ang suspek boluntaryong mitahan sa kagawad sa Calamba nga si Anna Lozano ug sa mga tanod ug gi-turnover sa kapulisan lakip na ang armas nga .38 revolver. (BANATNEWS)