Taga Quiot apektado sa gipaphang trabahante

CEBU, Philippines - Gibutyag ni Kapitan Vicente Ramos sa barangay Quiot , dakbayan sa Sugbo nga apiktado kaayo ang mga papahawaunong molupyo sa Sitio Back Japer, barangay Quiot ang di pag-renew sa City Hall sa 14 ka mga empleyado nga nadestino sa Welfare of the Urban Poor (DWUP).

Sumala pa sa kapitan nga kasagaran sa maong mga empleyado maoy nasuheto sa problema sa taga Sitio Back Japer ug nasinati sa   kahimtang sa kaping 300 ka balay sa maong dapit.

Gipanglantawan hinuon ni Ramos nga 80 ngadto sa 100 lang ka panimalay ang giingong makaangkon og relocation site sanglit mao kini ang orihinal nga nagpuyo sa maong lugar sukad pa niadtong 1994.

Nagkanayon usab si Ramos nga pangitaan niya og paagi nga mapahimutang og tarong ang iyang konstituwente.

Matud pa ni Ramos nga sa miaging tuig pa giluwat ang court order sa demolisyon apan kanunay lang kining giuswag   sa laing petsa subay sa ilang hangyo ngadto sa pribadong tag-iya sa luna.

Gitataw hinuon niya nga respetohon niya ang desisyon sa korte kung hingpit na gyud nga ipatuman niini ang demolisyon ug gipaalerto niya kanunay ang ilang mga tanod sa higayon nga adunay mamugna nga kagubot.

Ang Barangay Kinasang-an maoy usa sa gipilian nga relocation site kaniadto apan pipila sa mga residente sa Back Japer nagdumili sa pagdawat niini. Mitambag na usab si Ramos sa maapektohan sa demolisyon nga dawaton na lang gyud kung unsa nga relocation site nga ihatag kanila sa gobyerno sanglit maglisod na sila og supak kung ang korte na ang modesisyon.

Gipadayag hinuon sa kapitan nga giasikaso na karon sa taga City Hall ang maong suliran aron kahatagan kini og dinalian nga solusyon.  - BANAT NEWS