CEBU, Philippines - Nagsugod na og suroy-suroy sa probinsiya sa Sugbo ang anak ni Gobernador Gwendolyn Garcia nga si Capitol Consultant on Special Project Institutionalization Atty. Ma. Ezperanza Cristina Garcia Frasco.
Niadtong Biyernes ug Sabado, si Cristina didto mosuroy sa tulo ka mga lungsod sa isla sa Camotes nga mao ang lungsod sa Tudela, San Francisco ug Poro.
Hinuon iyang gipasabot nga igo lamang siyang mituman sa mando sa iyang inahang gobernador nga pabisitahan kaniya ang tulo ka mga lugar sa Camotes alang sa pipila ka mga programa sa Kapitolyo sa maong mga lungsod tungod kay may mga importanteng lakaw ang gobernadora.
Ang mga katawhan usab sa tulo ka mga lungsod mainiton kaayong mihangop sa anak sa gobernador kinsa maoy nangunay sa pagpanghatag og tabang nga gatas, reading glasses, tsinelas ug uban pa alang sa mga idad-idaran na isip kabahin sa "Halad sa Gugma alang kang Lolo ug Lola" nga gipasiugdahan ni Gobernador Garcia. Gawas niini si Cristina mipasiugda usab sa pagpanghatag og gatas ug lugaw alang sa supplemental feeding sa mga kabataan.
Samtang gipanghatag usab niini ang mga computer, anti-rabies vaccine ug mga vegetable seedling alang sa Food Always In The Home (FAITH) program sa lalawigan sa Sugbo ngadto sa tulo ka mga lungsod. - BANAT NEWS