Lalaki Naghikog

CEBU, Philippines - Patay na nga napalgan diha sulod sa kwartong giabangan sa iyang kapuyong mahuyang ang usa ka 35-anyos nga ulitawo human giingong naghikog gamit ang malong kagahapon sa hapon sa Zone Okra, barangay Paknaan, dakbayan sa Mandaue.

Ang naghikog giila sa mga polis nga si Junard Banquisio, nagpuyo sa nahisgutang dapit apan lumad nga taga lungsod sa Tabuelan ug nagtrabaho kini sa canteen sa usa ka kompaniya sa sakyanan. Si SPO2 Danny Barreta sa Police Station 3 sa pakighinabi niini sa Banat News kagahapon nagkanayon nga usa ka “Bernadeth” nga residente diha sa lugar nga nahitaboan maoy mitawag sa ilang buhatan ug mireport sa maong insidente.

Base sa nahipos nga report sa kapolisan nga sa wala pa kini mahitabo si Banquisio nag-inom kini ug misulod sa kwartong giabangan ug sa kapuyo nga si Joel Arela, 39, mga alas 4:00 na sa kaadlawon kagahapon.

Apan matud ni Barreta nga giingong si Banquisio ug ang kainom niini nagkalalis ug dayon nagbuwag-buwag na.

Walay report nga nahipos ang kapolisan kung nagkasinukmagay ba ang duha ug sa hinungdan sa ilang lalis ug wala usab makuha sa mga polis ang pangalan sa kainom ni Banquisio. Si Arela kinsa kauban usab ni Banquisio diha matulog sa pikas kwarto ug dihang mangandam na unta kini aron mo-duty mituktok kini sa ilang kwarto apan walay miabli ug lock ang pultahan hinungdan nga gipugos na niini og abli ang pultahan.

Mao na lang nasugat sa panan-aw ni Arela si Banquisio nga nagbitay na diin ang liog niini dunay higot nga malong ug ang pikas tumoy gikutay sa paros sa kwarto. Si Arela daling nanawag og panabang. Si Barreta midugang nga gihulagway sa iyang mga silingan nga si Banquisio usa ka hilomon ug walay nakabantay nga nagpakita kini og timailhan nga maghikog.  - BANAT NEWS