Mga kasong Ouano dismiss na

CEBU, Philippines - Hingpit na nga gi-dismiss sa buhatan sa Ombudsman sa kaulohan ang mga kasong administratiba nga giatubang ni kanhi Mandaue City mayor ug karon Board Member Thadeo Ouano sa ikaunom nga distrito sa lalawigan sa Sugbo.

Kini sa dihang si Ouano naglambigit sa kontrobersiya sa gialigar nga pagpaburot sa presyo sa lamppost nga gipanarok sa kadalanan sa maong dakbayan atol sa 12th Asean Summit nga gipahigayon dinhi sa Sugbo niadtong tuig 2007.

Gilakip si Ouano sa gipasakaan sa maong kaso uban usab sa kadagkoan   sa Department of Public Works and Highways (DPWH) ug mga lokal nga opisyal sa dakbayan sa Lapulapu nga gipangulohan usab ni kanhi Mayor Arturo Radaza ug karon kongresista na sa Lone Congressional District sa dakbayan sa Lapulapu.

Sa 19 ka pahina nga hukom nga giluwatan ni Acting Ombudsman Orlando Casimiro niadtong Oktobre 1, 2010 ug niadtong miaging adlaw lang nadawat sa maong akusado mipasabot nga ang pagkapili isip bokal ni Ouano niadtong Mayo 2010 nga eleksyon mao usay naghatag og kahigayonan sa hingpit usab nga pagkatangtang sa kasong administratiba nga iyang giatubang. WC) (BANAT NEWS)