Polis mohatag 'commendation' ni Joavan

CEBU, Philippines - Ang kanhi badlongong sinagop ni Mayor Socrates Fernandez sa dakbayan sa Talisay nga si Joavan Fernandez gikatakdang hatagan og komendasyon sa Talisay City Police Station (TCPS) tungod sa natabang niini sa pagsikop sa suspetsadong tulisan kinsa mipusil patay kang PO1 William Mangubat Jr.

Si Chief Inspector Eddie Recamara, officer-in-charge sa TCPS mibutyag sa  Banat News nga si Joavan nakahatag og pinansiyal nga tabang kanila sa ilang pagbiyahe ngadto sa Tangub City Misamis Occidental aron pagsikop kang Noel Simbajon.

Sila si Insp. Hugo Rio Ipong ug PO2 Roy Lofranco ug si Joavan maoy kauban ni Recamara sa pag-adto sa Ozamis. Gawas niini si Recamara mipadayag usab sa iyang dakung kahinangop sa suportang gihatag sa lokal nga kagamhanan sa Talisay ngadto sa kapolisan.

Niadtong Huwebes sa hapon si Joavan nanawag sa Banat News nagpahibawo nga miabot na sila sa ilang biyahe gikan sa Misamis  dala ang ilang dinakpan nga si Simbajon.

Sayo niini si Kongresista Eduardo Gullas sa unang distrito sa lalawigan sa Sugbo wala kaayo makauyon sa pagpakigsuod ni Joavan ngadto sa kapolisan.

Kini tungod kay nabalaka siya nga ang kapolisan posibleng dili na unya maka-implementar sa angayan nilang buhaton kung ugaling si Joavan makahimo na usab kini og kalapasan sa balaod.

Apan matud ni Recamara nga ipasalig niya ngadto sa publiko nga kung si Joavan makahimo og kalapasan dili siya magpanuko sa pagpatigbabaw sa balaod batok sa sinagop sa mayor.

Miingon siya nga isip usa ka professional nga opisyal sa kapolisan igarantiya niya sa tanang katawhan nga maayo siya kang Joavan tungod kay maayo kini ngadto sa kapolisan ug sa Talisaynon, apan kun magbuhat kini og daotan, ang ngipon sa balaod ipatuman usab nga higpit batok kaniya, ni Recamara pa.

“Si Recamara nagkanayon usab nga tanang kaayohan nga gihimo ni Joavan alang kanila iya kining hangopon apan wala magpasabot nga mabotaan ang kapolisan, tungod niini, dugang niyang pagpasabot. (WC) (BANAT NEWS)