CEBU, Philippines - Napusilan patay ang usa ka drayber sa traysikad nga ig-agaw sa mayor sa Argao sa iyang suod nga higala sulod sa aircon bus nga Ceres Bus human gikomprontasei sa biktima ang drayber sa maong bus sa miaging alas-6 sa gabii diha sa barangay Poblacion sa lungsod sa Argao.
Ang biktima giila sa kapulisan nga mao si Junjun Espina, 23, taga Poblacion, Argao nahiagom og usa ka samad pinusilan sa iyang tangkugo nga miresulta sa iyang kamatayon.
Samtang giila ang suspek nga mao si Danilo Puerto, silingan ug suod nga higala sa biktima kinsa wala madakpi sa hot pursuit sa kapulisan.
Si SPO1 Jaime Mendoza sa Argao Police station sa pakighinabi sa Banat News nagkanayon nga parehong hubog ang biktima ug suspek gikan sa usa ka salo-salo.
Nagkuyog ang duha sakay sa traysikad nga gimaneho sa biktima, apan pag-abot sa Poblacion miagi ang Ceres Bus nga dunay body number 836 nga gimaneho ni Luciano Bustamante, 53, taga Lamac, Pinamungahan.
Si Bustamante naangol usab sa maong hitabo human mapusili sa iyang paa.
Ang Ceres Bus gikan sa lungsod sa Santander ug paingon sa dakbayan sa Sugbu ug gipukpok sa biktima ang kilid sa Ceres Bus kay diriyot sila masagrihi niini.
Si Bustamante nagtuong dunay mosakay mihunong kini siya ug gitarong paglugar ang iyang gimanehong bus ug giablihan ang pultahan apan misaka dayon si Espina ug gikomprontase sa naulahi samtang si Puerto didto nagbarug sa atubangan sa Ceres bus.
Usa ka Kerby John Cahilig, pag-umangkon ni Puerto nga naglingkod daplin sa karsada nakasaksi sa maong hitabo hinungdan nga iyang gisaka si Espina ug giagbayan aron mokanaog.
Apan kalit lang namusil si Puerto diha sa gawas hinungdan nga naigo sa tangkugo si Espina ug natapsingan ang walang kamot ni Cahilig samtang si Bustamante naigo usab sa tuong bagtak.
Ang tulo ka samaron daling gidala sa tambalanan sa Argao apan si Espina gi-refer sa doctor nga dad-on sa tambalanan sa dakbayan sa Sugbu.
Si SPO1 Mendoza nagkanayon nga diha palang sa Carcar nakadawat na sila og impormasyon nga nakabsan na sa iyang kinabuhi si Espina sulod sa ambulansya apan gilahos nalang sa South General Hospital diin siya gideklarar sa doctor nga dead on arrival (DOA).
Nakuha sa kapulisan sa crime scene ang duha ka kabhang sa .45 nga kalibre sa armas nga maoy gigamit ni Puerto sa pagpusil.
Nagtuo ang kapulisan nga ang drayber unta sa bus maoy pusilon ni Puerto apan tungod sa kahubog si Espina hinuon ang unang naigo niini.
Matud ni Mendoza ang igsuon ni Espina nga si Jimuel anaa karun sa ilang detention cell human nila gidakop kay gibato niini ang windshield sa bus hinungdan nga maayong pagkabuak niini lakip na ang side mirror. (BANAT NEWS)