CEBU, Philippines - Usa ka 11-anyos nga batang babayeng tinun-an sa grade five ang nakaangkon og pangos sa iyang bukton ug tuhod human miambak sa iyang gisakyan nga traysikad tungod sa nakit-ang duha ka syringes (injections) sa iyang tapad nga lalaki.
Kini tungod usab sa pahimangno sa inahan nga adunay mga adis-adis nga mangalit og panuslok og injection.
Sa kahadlok sa biktima nga injectionan, miambak siya sa traysikad nga nagdagan ug daling nagpatabang sa iyang silingan nga sakop sa Bureau of Jail Management and Penology (BJMP) ug gidala sa police station aron magpa-blotter sa hitabo.
Nahitabo kini niadtong Miyerkules sa alas-6 sa gabii diha sa Tabura St. , sa barangay Poblacion Pardo siyudad sa Sugbu.
Ang bata nagkanayon sa mga tigbalita kagahapon sa udto sulod sa tunghaan sa Pardo Elementary School misaysay nga luwan siya sa usa ka traysikad padulong pauli dihang dihay usa ka wala mailhing lalaki ang mitupad og sakay kaniya.
Matud sa bata nga sa pag-abot nila sa may Tabura St. , iyang nabantayan nga adunay gikuot sa bulsa ang maong lalaki nga duha ka syringes diha sa plastic bag nga gidala niini.
Tungod sa iyang kahadlok ug pagduda, iyang gimanduan ang drayber sa traysikad nga pahunongon kay manaug nalang siya apan giingnan hinuon siya sa drayber nga “suwerte kaayu ka day.”
Napugos siya sa pag-ambak bisan nagdagan ang traysikad apan gihawiran ang iyang uniporme sa maong lalaki hinungdan sa pagkasukamod niya sa karsada ug nasamad ang iyang simod, walang siko ug walang tuhod.
Si SPO1 Leonora Ramas sa Womens Desk and Protection nga nahinabi sa mga tigbalita miingon nga ilang nailhan ang suspek nga si Alberto Paredes, 24, taga Upper Suran Villa Conception sa barangay Kinasang-an.
Ang kapulisan daling mihimo og hot pursuit operation sa suspek apan giingong gitagoan kini sa iyang kapuyo hinungdan nga wala kini madakpi. Wala usab matino para unsa ang gidala-dala niining syringes.
Si Cora Dagne sa Gender and Development sa brgy. Kinasang-an miingon nga ilang tabangan ang ginikanan sa bata ug kun unsay makab-ot niining desisyon nga mopasaka og kaso batok sa suspek ilaha kining suportahan. (BANAT NEWS)