CEBU, Philippines - Usa ka 32-anyos nga lalaki nga giingong gidakop sa mga sakop sa Barangay Peacekeeping Action Team (BPAT) nga sakop sa Fuente Police Station human gipasanginlang nanulis, namatay sulod sa tambalanan kagahapon sa alas 12:25.
Ang biktima giila sa kapulisan nga mao si Joven Tejano Muñez, alyas ‘Ongkoy’, 32, nga taga sitio Mahayahay, A. Lopez sa barangay Calamba siyudad sa Sugbu.
Subay sa pasiunang imbestigasyon ni SPO4 Alex Dacua sa Homicide Section sa Cebu City Police Office (CCPO) nagbutyag nga sa sayo pa gidakop ang biktima sa usa ka Rafael Enriquez sakop sa Tracker Team sa Fuente Police Station tungod sa kasong robbery diha sa sitio Sadpa sa barangay Sambag 2, alas 3:30 niadtong Huwebes sa hapon.
Gi-turnover ni Enriquez sa mga sakop sa miscellaneous team nila ni PO2 Edward Acop ug PO1 Rey Pabroa nga maoy duty niadtong higayona ug gi-detain ang biktima sa detention cell.
Dugang imbestigasyon sa kapulisan nga si PO3 Achiles Sanchez nga duty usab niadtong tungora maoy nakadiskobre sa biktima nga naglisod na og ginhawa sulod sa detention cell sa mga babaye.
Dali niining gipahibawo ang assistant desk officer nga si PO2 Allan Vallejo kinsa maoy midala sa biktima sa Cebu City Medical Center (CCMC) apan gideklarar sa doktor nga dead on arrival (DOA).
Atol sa gihimong pakisusi sa patay’ng lawas sa biktima sa mga tinugyanan sa maong tambalanan inabagan sa mga sakop sa Crime Scene Investigation Unit (CSIU) nasuta nga ang biktima nakaangkon og grabeng bun-og sa nagkadaiyang parte sa iyang kalawasan nga maoy nakaingon sa hinanali niining kamatayon.
Si Anita Tijano, 65, inahan sa biktima nga na-interview sa TV5 Cebu, mitug-an nga niadtong Huwebes ang iyang anak diha ra sa ilang balay apan nahibulong siya nianang pagkahapon nga wala na diha kay naandan niini nga maligo gyud kada hapon iyang anak.
Tungod sa kabalaka nga wala na niya makit-i ang anak nakahukom siyang pangitaon kini sa barangay hall hangtud nga nakahuna-huna siya nga moadto sa Fuente Police station.
Matud sa inahan nga sa iyang pag-abot sa Fuente Police Station wala dayon siya tug-ani sa mga pulis apan pagkataud-taod miabot si Chief Insp. Michael Anthony Bastes ang hepe sa maong buhatan.
Si Bastes na maoy mipahibalo kaniya sa nahitabo sa anak ug dihang iyang gipangutana kung napusilan ba sa pulis ang iyang anak giingong gitubag siya niini nga natumba ra kini.
Si Anita mihimakak sa pasangil nga nanulis ang iyang anak tungod kay abnormal kini og pangisip ug maoy sugo-suguon sa mga silingan paglabay sa ilang mga basura.
Si Bastes sa iyang bahin atol sa interbyu miingon nga iyahang gipaubos sa imbestigasyon ang tanan niyang sakop nga duty niadtong higayona aron masayran kun si kinsa ang dunay lapses ug ang resulta sa imbestigasyon iyang iduso ngadto sa Investigation and Detective Management Branch (IDMB) sa CCPO aron patas ug wala siyay gilabanan sa iyang mga sakop.
Gitataw niya nga gi-turnover ra sa ilang buhatan ang biktima sa usa ka BPAT ug posibleng didto pa kini gitabangan og kulata atol sa pagdakop ug sa dihang gi-turnover kanila labihan nang bun-oga. Gipanghimakak usab ni Bastes nga mitanyag siya og P10 mil sa inahan hinuon andam siyang mopailawom kun duna may pagahimuon nga imbestigasyon batok sa maong alegasyon.
Kagahapon gimando ni Sr.Supt. Melvin Ramon Buenafe ang pagrelibo kang Bastes ug tulo niini ka mga sakop diha sa Fuente samtang adunay lawom nga imbestigasyong buhaton kabahin sa nahitabo.(EIM) (BANAT NEWS)