Ex-convict milugos sa dalagita

CEBU, Philippines - Nagtingkagol sa Talisay City detention cell ang usa ka 27-anyos nga ex-convict human kini giingong nasakpang nanglugos sa usa ka 13-anyos nga dalagita sa barangay Lawaan I, dakbayan sa Talisay sa miaging adlaw.

Ang suspetsado kansang ngalan gipugngan sa kapolisan, usa ka lumad nga taga Zamboanga del Sur ug katabang sa pamilya sa biktima.

Sa interview sa mga tigbalita kaniya kagahapon, giangkon sa suspek nga siya ug ang biktima nagka-uyab   sulod na sa kaping usa ka buwan, apan gipanghimakak kini sa biktima.

Si PO1 Violeta Godinez sa Women and Children’s Protection Desk sa Talisay City Police Station nga nahinabi sa mga tigbalita nagkanayon nga ang bata misumbong kaniya nga gisugdan siya og lugos sa suspetsado niadtong buwan sa Mayo niining tuiga sulod sa balay sa iyang uyoan apan wala siya mosulti ngadto sa iyang mga ginikanan tungod sa kahadlok.

Ang mga ginikanan sa biktima maoy gipiyalan sa pagbantay sa balay sa uyoan niini nga duol ra usab sa ilang balay.

Hinuon matud ni Godinez ang bata nagkanayon nga wala siya hulgaa sa suspetsado apan gunitan lang ang iyang mga kamot ug sampongan ang iyang baba aron dili siya makasinggit ug makasukol sa panahon nga lugoson na siya niini.

Niadtong Hulyo 3, 2011 sa buntag maoy ikaduhang higayon sa paglugos kaniya dihang nakit-an sila sa 10-anyos nga manghod sa biktima nga mao nay misumbong ngadto sa ilang ginikanan.

Matud ni Godinez nga atol sa maong mga hitabo ang ginikanan sa bata wala diha sa balay tungod kay ang amahan didto sa iyang trabaho ug ang inahan didto sa merkado.

Ang suspek kinsa napriso sulod sa dul-an duha ka tuig sa Cebu Provincial Jail tungod sa kasong robbery ug simple theft, nagkanayon nga tanang ipasangil kaniya sa biktima iyang angkonon ug andam siya sa pagdawat sa silot nga ipahamtang kaniya.

Kagahapon gitakda siyang pasakaan og kasong pagpanglugos nga usa ka paglapas sa Akta Republika 7610 kon “Child Abuse”. (BANAT NEWS)