2 garbage trucks sa Mandaue gidakop sa Danao

CEBU, Philippines - Gidakop ug gi-impound sa mga awtoridad sa dakbayan sa Danao ang duha ka garbage compactor trucks sa kagamhanan sa dakbayan sa Mandaue human kini masakping milabay sa ilang mga basura sa sitio Tac-an sa barangay Guinacot siyudad sa Danao niadtong Lunes sa alas 10:00 sa gabii nga way pagtugot sa mga opisyal sa maong siyudad.

Ang gidakop sa kapulisan mao ang Garbage Compactor truck nga dunay plaka nga GLS-118 nga gimaneho ni Jojo Teopiz Alinsunod, 29 ug ang laing trak gimaneho ni Ernesto Paraiso, 42, pulos mga taga Umapad, Mandaue. Gi-apil og sikop ang lima ka helper sa maong garbage trucks ug kasamtangang gibalhog sa karsel sa kapulisan ug gi-impound sab ang ilang garbage compactor trucks.

Matud ni SPO4 Edgar Gomez sa Danao City Police dihang nahinabi sa Banat News subay sa imbestigasyon nakadawat sila og reklamo gikan sa tawag sa telepono kabahin sa duha ka nagsunod nga garbage trucks nga paingon nga molabay og basura sa maong lugar. Daling miresponde ang kapulisan pinangulohan sa hepe nga si Chief Insp. Alvin Ballo ug naabtan pa sa akto ang maong duha ka garbage compactor trucks nga naglabay sa ilang basura. (BANAT NEWS)