Medical assistance gipaimbistigar na

CEBU, Philippines - Mikabat og kapin sa P2.2 milyones ang balor sa tambal nga napagawas gikan sa Eversley Child Sanitarium Hospital (ECSH) pinaagi sa medical assistance ni 6th district Congressman Gabriel Luis Luigi Quisumbing nga gigamitan og dili tinuod nga mga ngalan sa pasyente.

Kini maoy usa sa nasuta ni manlalaban Joselita Bighani Sipin, ang chief of Staff ni Congressman Quisumbing sa nagpadayon nga finding investigation labot sa kontrobersiya sa medical assistance sa kongresista sa ECSH sa siyudad sa Mandaue.

Matud pa ni Sipin nga niadtong miaging semana gitawag sa fact finding team nga gilangkuban sa mga opisyales sa Department of Health ang mga opisyales sa ECSH nga nalambigit sa nahisgotang anomaliya.

Sumala ni Sipin nga ila nang nakuha ang daghang mga dokumento kalabot sa pagpagawas og mga medisina ubos sa medical assistance fund ni Kongresista Quisumbing ug nakita nila   ang kadako sa kantidad nga nagamit sulod lamang sa pipila ka bulan.

Gipahibawo ni Sipin nga ang buhatan ni Kongresista Quisumbing migahin og P900 mil alang sa mga pasyente sa ECSH apan wala damha nga misaka ngadto sa P2.2 milyones ang bayronon sa buhatan ni Cong. Quisumbing sa maong mga tambal.

Gumikan niining nadiskobreng mga binuang ang nahisgutang fact finding team mopagawas unya og rekomendasyon alang sa tukmang aksyon batok sa mga opisyal nga maoy nagpasiugda sa maong anomaliya.(WC)  (BANAT NEWS)