Kaparian sa Sugbu wala kadawat og Pajero sa PCSO

CEBU, Philippines - Gipanalipdan sa Archdiocese sa Sugbu ang migimaw karon nga isyu kabahin sa giingong pagdawat og mga mahalong butang sama sa mga luxury cars sa mga Obispo ug kaparian gikan sa kanhing administrasyon ni kanhi presidente ug karon Pampanga Representative Gloria Macapagal-Arroyo.

Nagsugod ang maong isyu dihang mismo si Philippine Charity Sweepstakes Office (PCSO) chair Margarita Juico ang mikompirmar sa taho nga pipila ka mga Obispo ang nakadawat og mga sakyanan nga gipalit gikan sa ilang pundo ilawom sa kamandoan ni Arroyo sa wala pa kini minaog sa pwesto isip presidente.

Tungod niini, gitawag ang simbahan nga “Malacañang Diocese.” Kini kusganon hinuong gisupak sa mga kadagkuan sa Catholic Bishops’ Conference of the Philippines (CBCP).

Sa ilang bahin, giklaro sa Archdiocese sa Sugbu nga wala kini mahitabo sa ilang mga Obispo ug kaparian , sukwahi sa mga luxury cars, kasagaran sa mga gipanggamit sa mga pari dinhi sa Sugbu mao ang mga second class nga sakyanan.

“Diri sa atoa wala gyud na maabot ang mga luxury cars, second hand hinuon daghan ug ang uban ani personal gyud nga gipanag-iya sa mga pari o di man sa parokya,” matud pa ni Msgr. Esteban Binghay, Episcopal Vicar sa Archdiocese sa Sugbu sa pakighinabi sa Banat News.

Gipasabot hinuon ni Binghay nga wala siyay nakitang dautan sa pagdawat og mga mahalong butang gikan sa kagamhanan basta wala lang kini gamita sa personal nga interes sa usa ka pari o Obispo.

Sama ra usab niini ang iyang baruganan sa pagdawat sa simbahan og mga donasyon gikan sa PCSO ug Philippine Amusement and Gaming Corporation (PAGCOR).

Giklaro ni Binghay nga ang pagdawat sa simbahan og hinabang gikan sa maong mga ahensya nagpasabot na nga mosuporta na ang simbahan sa sugal.

Ang simbahan motabang sa mga kabus nga nagkinahanglan og kwarta tungod sa nasakit nga kabanay pinaagi sa pag-abag kanila nga maka-avail sa pundo gikan sa PCSO ug sa PAGCOR.

“Ang mga kaparian sa simbahan nagsilbe ra nga mediators para sa mga kabus nga dili makamao mangayo og tabang sa PCSO ug wala mangayo ang simbahan aron gamiton for religious purposes,” dugang pa niya. (BANAT NEWS)