Dugang 200 ka polis ibutang sa CCPO
CEBU, Philippines - Dugangan og 200 ka mga pulis ang Cebu City Police Office (CCPO) sumala pa ni Chief Supt. Ager Ontog Jr. tungod sa gilapdon sa hurisdiksyon sa maong siyudad ug kalamboan sa ekonomiya niini. Si Ontog namulong niini kagahapon human sa awarding ceremony diha sa Police Regional Office-7 sa 16th Police Community Relations Month Celebration.
Si Ontog nagkanayon nga kulang kaayo og mga polis ang CCPO nga gikunsiderar nga maoy labing dako og hurisdiksyon. Gikatakdang anha ibutang ang dugang 200 ka mga polis gikan sa Regional Public Safety Battalion (RPSB) nga sa pagkakarun gipailawom pa sa pagbansay-bansay sa counter terrorism training.
Ang RPSB dunay ihatag nga 400 ka polis ug ang sobra sa 200 nga i-download sa CCPO ihatag sa ubang City Police Offices sa Central Visayas nga nagkinahanglan usab og dugang puwersa.
Si CCPO director Sr. Supt. Melvin Ramon Buenafe nagkanayon nga kapin sa 800 nalang ka polis ang naa karon sa CCPO ug ang dugang 200 ka polis dako na og ikatabang.
Orihinal nga pwersa sa CCPO kaniadto miabot og kapin usa ka libo apan bisan may gibalhin ug miretiro walay napuling polis.
“One policemen is to 1,000 mao nay bantayan sa una sa pulis, pero karun 1 policemen is to 2 thousand plus na ang bantayan, sa ato pa nagkabug-at ang responsibilidad pag manage sa peace and order,” pasabot pang Buenafe. (BANAT NEWS)
- Latest
- Trending
