CEBU, Philippines - Gikulata una pa gilugos ug pagkahuman gitulis pa ang hinipusang kwarta sa usa ka 75-anyos nga lola nga nag-inusarang nagpuyo sa balay niini sa usa sa mga bukirang barangay sa siyudad sa Carcar kagahapon sa alas 12:30 sa kaadlawon.
Ang biktima (pangalan gipugngan sa Banat News) giingong nag-inusara nalang nga nagpuyo sa maong bala human mangaminyo ang mga anak niini ug naglain na og balay.
Samtang padayon pa ang kapolisan sa pagtumbok sa responsable kinsa giingong nakahigayon sa paghimo sa krimen tungod sa kangitngit niadtong tungura.
Matud ni PO1 Rosendo Benondo sa Carcar City Police Station dihang nahinabi sa Banat News base sa gihimong imbestigasyon nila ni SPO1 Nestor Gascon ug mga kaubanan ang biktima gikan mitambong og Santos nga Misa ug sa pagpauli diretso kining natulog gumikan kay kaadlawon pa.
Apan dihang naghigda na kini kalit lang may mitupad kaniya nga usa ka wala mailhing lalaki hinungdan nga misuway unta pagkisi-kisi ang biktima apan kalit siyang gisukmag niini sa tiyan.
Tungod sa pangidaron ug kasakit sa gihimo sa gikatahapan wala na kini makalihok pa sa sunod nga gibuhat sa maong lalaki nga midiretso og among-among kaniya. Pagkahuman sa yawan-ong buhat wala pa gyud matagbaw ang maong lalaki human mag-ilis sa sapot gikuha pa niini ang tinago-ang kwarta sa biktima nga moabot og P34 mil.
Ang maong lalaki nagdaling misibat sa balay ug niana pang higayuna nakapangayo og panabang sa mga silingan ang biktima.
Ang mga mirespondeng polis igo nalang sa pag-abag sa biktima dihang gihatud sa mga tanod sa Carcar District Hospital tungod sa gimulo sa kasakit sa iyang gusok nga gisukmag sa rapist nga tulisan.
Ang biktima napakyas paghatag sa kapolisan sa deskripsyon sa tulisang rapist gawas lang nagtuo siyang hamtong na kini. Ang biktima gi-transfer sa tambalanan dinhi sa dakbayan alang sa dugang medikasyon ingon man ipaubos sa eksaminasiyon.
Ang kapulisan sa Carcar pinangulohan sa imbestigador nga si SPO1 Reynaldo Fuentes mibalik sa crime scene kagahapong adlawa aron pagpanghipos og dugang ebidensiya ug impormasiyon aron matumbok ang responsabli. (EIM) (BANAT NEWS)