CEBU, Philippines - Duha ka two nga drayber ug operator sa traysikad pulos napusilan angol didto sa dakbayan sa Danao sa miaging Sabado sa gabii.
Ang mga biktima mao sila si Rubenson Ricamo Cornella, 30, ulitawo, drayber sa traysikad nga lumad nga taga dakbayan sa Dipolog ug temporaryong nagpuyo sa Danao, ug Sharpe Sabaiton Medalle, alias “Kiyaw-Kiyaw”, 36, minyo, operator sa traysikad nga taga Poblacion.
Si SPO2 Matias Galo sa Danao City Police Station mibutyag sa Banat News nga si Cornella didto pusila sa wala hiilhing tawo sa highway sa barangay Looc nianang alas 11:10 sa kagabhion.
Matud pa ni SPO2 Galo nga si Cornella didto sa sulod sa ilang balay dihang misaka ang kriminal ug giluthang ang bukton niini.
Samtang si Medalle didto pusila sa barangay Poblacion nianang pagka-alas 11:45 sa kagabhion.
Nasayran nga nanira na sa garahian sa iyang mga traysikad si Medalle dihang may miabot nga lalaking nagsul-ob og helmet ug mipusil sa biktima.
Unya ang kriminal misibat dayon human matumba ang biktima sa yuta kansang lawas nabulit sa mga samad sa bala.
Ang duha ka mga biktima igo lang gipasimhot didto sa Danao City District Hospital kay gibalhin dayon kini sa Vicente Sotto Memorial Medical Center sa dakbayan sa Sugbo.
Padayon pang gipangita sa kapolisan ang mga kriminal uban ang pagsuta sa motibo sa maong mga pagpamusil. (WC) (BANAT NEWS)