Tubig sa Talisay kagawon

CEBU, Philippines - Ang 22 ka barangay sa dakbayan sa Talisay gimandoan sa konseho sa siyudad nga mohandos og sample sa tubig gikan sa ilang mga tinubdan ngadto sa Cebu Provincial Health Office (CPHO) human nila madawat ang report nga adunay barangay sa Talisay kansang tinubdan sa tubig kontamenado sa fecal bacteria.

Sa milabay’ng semana giaprobahan sa siyudad ang resolusyon nga gipangama-hanan ni Konsehal Choy Aznar, chairman sa council committee on health nga mipasabot sa kamahi-nungdanon sa hinlo nga tubig alang sa maayong panglawas sa katawhan.

“The need for urgent re-assessment of the fitness of potable water extracted by the people at the ground sources in the City of Talisay is of paramount importance in preventing possible outbreak of waterborne diseases due to the contamination of the water supply”, tipik sa resolusyon ni Aznar.

Si Aznar nagkanayon nga ang sitwasyon nagkinahanglan og dinaliang pagtagad aron malikayan ang pagkuyanap sa bacteria ilabi na karon nga nagsige og bunok ang uwan ug gikabalak-an nga daghang klase sa kagaw ang motumaw nga makadaot sa panglawas sa tawo sama sa kalibanga ug uban pang matang sa sakit sa tiyan.

Sa milabay’ng buwan nasuta sa Provincial Laboratory sa CPHO nga ang tulo ka mga tinubdan sa tubig sa sitio Campinsa barangay Manipis, namatud-ang kontamenado sa fecal organism.

Kini nahibaw-an human ma-eksamin ang mga water sample gikan sa maong mga tinubdan niadtong Hunyo 7, 2011.

Gibutyag ni Aznar nga ang team sa mga inspector gikan sa City Health Office mipadala dayon og mga tambal sa tubig ngadto sa maong mga tinubdan.

Matud usab sa konsehal nga sa labing daling panahon edukahon nila ang mga residente sa kabarangayan sa Talisay ilabi na kadtong tua sa bukirang barangay ug daplin sa kabaybayonan bahin sa proper hygiene ug sanitation.

Nahibaw-an nga kasagarang mga residente sa Campinsa walay mga pansayan ug anha lang kilid-kilid o kalibunan motubag sa sugo sa lawas.

Gibutyag usab ni Aznar nga ang milabay’ng administrasyon nanghatag og mga toilet bowl sa mga residente sa maong lugar.  (BANAT NEWS)