28-anyos naghikog

CEBU, Philippines - Usa ka 28- anyos nga lalaki nga giingong dugay nang nag-antos sa sakit nga nervous breakdown ang naghikog diha sa ilang panimalay sa sitio Sansan sa barangay Manyo lungsod sa San Remegio niadtong Biyernes sa ala 1:00 sa hapon.

Ang gituohang nagpakamatay mao si Carlito Mondejar, 28, nagpuyo sa nahisgutang lugar kinsa napalgang may hikot nga pisi diha sa iyang liog nga gihikot usab ngadto sa sagunting sa atop sa ilang balay.

Matud ni PO2 Herman Bulawet sa San Remegio Police dihang nahinabi sa Banat News subay sa imbestigasyon si Mondejar nadiskubrehan sa anak nga si Jonathan.

Ang asawa ni Mondejar nga si Cristina mitug-an sa kapulisan nga unom ka buwan na kapin nga nag antos sa nervous breakdown kini.

Gani dugang niya niadtong milabay’ng Huwebes sa alas 2:00 sa hapon nasakpan nila kini uban sa iyang mga anak ug paryente nga naggunit na og pisi ug nagsuway na unta paghikog apan ilang napugngan ug sukad niadto ilaha na kining kanunay nga gibantayan.

Apan wala sila makabantay nga nawagtang kini sa balay pagkaalas 10:00 sa buntag adtong Biyernes ug pagkahapon mao nalay ilang nadunggan ang balita nga patay na kini. (BANAT NEWS)