Nangangkong suspek pag-ambush sa mayor sa Lanao di mao?

CEBU, Philippines - Gikwestyon sa kampo sa prosekusyon ang pagpatim-aw sa Cebu City Prosecutors Office niadtong Biyernes sa tulo ka mga suspek nga miangkong maoy responsable sa pag-ambush patay sa usa ka mayor sa Lanao del Sur niadtog milabay’ng tuig.

Ang mga suspek maoy miangkon sa pag-ambush sa mayor sa Tugaya, Lanao Del Sur nga si Mayor Alimatar Guroalim ug mga kaubanan didto sa Barangay Dilimabayan, Tugaya Lanao del Sur niadtong petsa 10 sa Setyembre, 2010 sa alas 6:30 sa buntag samtang paingon unta kini sa munisipyo niadtong tungura.

Ang Department of Justice (DOJ) mitugot nga anhi sa Sugbo sa Cebu City Prosecutors Office mohurar ang tulo ka mga nangangkong suspek sa krimen tungod kay ilang gituohang neutral ground ang Sugbo ug paglikay sa dugang kasamok.

Kini gitambungan sa tulo ka prosecutors gikan sa DOJ nga mituyo gyud pag-anhi sa Sugbo sa Cebu City Prosecutors Office niadtong Biyernes gumikan sa maong kaso.

Apan ang mga reklamante nga sila si Norodin Guroalim ug Mrs. Rohaminah Guroalim ang igsuon ug asawa sa gi-ambush nga mayor mi-kwestyon niini pinaagi sa ilang abogado nga si Atty. Rogelio Dones Evasco.

Si Evasco nga nagpa-interview sa DyDD mi-insister nga usa lamang sa mga nangangkong suspek ang tinuoray nga apil sa pagbanhig sa mayor.

Matud ni Evasco nga ang maong kaso nga pending karun sa DOJ ipadayon karung Biyernes sunod semana balik na sa DOJ Manila ug didto ilang i-presentar ang ilang mga saksi nga magtumbok sa tinuod nga mga suspek ug walay labot ang duha sa tulo nga mipatin-aw nga suspek.

Subay sa orihinal nga reklamo nga gisang-at sa banay’ng Guroalim, ang incumbent mayor nga si Alber Norol Balindong ug mga kaubanan ang ilang gitumbok nga responsable sa krimen ug lain pang 22 ka mga kaubanan niini.

Gani dunay tulo ka polis nga naapil sa orihinal nilang gipasakaan og kaso.

Ang pamilyang Guroalim nanawagan sa DOJ nga ipadali pag-resulbar ang maong kaso. (BANAT NEWS)