CEBU, Philippines - Ang kapolisan sa dakbayan sa Talisay naproblema karon kun may mga alarmang magdungan tungod kay ang ilang mga sakyanan nangagusbat na.
Si Chief Inspector Eddie Recamara, officer-in-charge sa Talisay City Police Station nga nahinabi sa mga tigbalita mibutyag nga ang Innova patrol car na lang ang ilang gigamit karon tungod kay ang duha nila ka Terrano patrol car ug usa ka multicab tua sa motorpool.
Hinuon matud niya nga maayo na lang kay ang iyang mga sakop may mga kaugalingong motorsiklo nga magamit panahon sa ilang pagpatrolya.
Apan kung adunay magdungan nga alarmang mahitabo ug adunay sikoponong mga kriminal, unahon nila ang labing bug-at nga insidente sa pagtubag. Gawas niini kung adunay mga i-follow-up nga kaso sa panahon nga mobundak ang uwan, makaligo gyud sa uwan ang polis nga madestino niini tungod kay motorsiklo may sakyanan.
Apan matud pa ni Recamara nga luyo ning maong suliran, wala magkulang ang ilang kaabtik sa pagsulbad sa mga krimen nga mohugpa sa maong dakbayan.
Hinuon sa pagkakaron walay mga dagkung alarma nga nahitabo sa maong dakbayan tungod kay ubay-ubay ang mga polis nga gipakatap sa nagkalain-laing suok sa siyudad.
Si Recamara midugang nga ang maong problema iya nang gipadangat ngadto sa lokal nga kagamhanan sa Talisay ug naghuwat lang siya sa tubag.
Misalig usab siya sa mga opisyal sa Talisay tungod kay hugot kaayo kining misuporta sa kalihokan sa kapolisan ug gituohan niya nga dali rang ikahatag niini ang mga sakyanan nga ilang gikinahanglan. (BANAT NEWS)