Ex-convict mikilkil sa polis

CEBU, Philippines - Usa ka ex-convict nahibalik sa prisohan dihang gisikop sa polis nga iyang gikilkilan didto sa barangay Lawaan III, dakbayan sa Talisay kagahapon sa buntag.

Ang suspetsado mao si Armando Baynos alyas “Mando”, “Arman”, “Ronald” ug “Robot”, hingkod ang panuigon, residente sa maong dapit.

Ang mga sakop sa intelligence sa Talisay City Police Station nga sila si PO3 Benedicto Lasque, PO2 Roy Lofranco ug PO1 Euwen Pitogo kinsa wala magsul-ob og uniporme miagi sa nahisgutang lugar diin ang suspetsado kinsa naghubo sa senina ug nagpakita sa iyang lawas nga napuno sa patik, nangayo og kuwarta kutob sa mga motoristang moagi.

Bisan silang mga polis, gilakip sa maong pangilkil sa suspetsado tungod kay wala siya magtuo nga mga otoridad sila kay wala man magsul-ob og uniporme.

Apan dihang mipaila sila nga mga polis sila, nakurat ang suspetsado ug wala na kini makaikyas kay dali kaayong naposasan human makuha gikan kaniya ang usa ka lata nga may sulod nga P15 nga iyang kinilkil ug usa ka linikit nga pinaugang dahon sa marijuana.

Si Lofranco nga nahinabi sa Banat News  mibutyag nga base sa ilang record, si Baynos nalambigit   sa kasong pagpangawat kaniadto apan ang biktima nga silingan niini wala mopasaka og kaso.

Apan si Baynos nga nahinabi sa Banat News mibutyag nga napriso siya sa Talisay City Jail niadtong tuig 2003 hangtod tuig 2005 tungod sa paghupot niya og armas nga walay lisensiya.

Giangkon usab niya nga nangilkil siya kagahapon sa mga mangaging motorista aron makapalit siya og sud-an.

Si Baynos gikatakdang pasakaan og kaso sa kapolisan sa kasong extortion ug kalapasan sa Akta Republika 9165 kon “comprehensive dangerous drugs act”. (WC) (BANAT NEWS)