Kalihukan sa PWD gibuksan

CEBU, Philippines - Hingpit na nga gibuksan kagahapon ang mga kalihokan sa 1st Cebu People with Disability (PWD) Month nga gipahigayon sa atubangan sa city hall sa dakbayan sa Mandaue nga gisalmotan sa mokabat og 2,000 ka mga tawo nga adunay kabilinggan sa ilang panglawas gikan sa nagkalain-laing dapit sa lalawigan sa Sugbo. Si Provincial Board Member Arliegh Sitoy nga maoy chairman sa committee on PWD sa hunta probinsiyal maoy nangulo sa pagbukas sa mga kalihokan nga gitambongan usab nila ni Provincial Board Member Julian Daan, Mayor Jonas Cortes ug mga sakop sa konseho sa dakbayan.

Si Board Member Sitoy miingon nga molungtad og usa ka bulan ang gihan-ay nga kalihokan sugod sa Hulyo 1 hangtod Hulyo 30 niining tuiga.

Naglakip sa gihan-ay nga mga kalihokan nga pagasalmotan sa mga bungol, buta, pungkol, bakol, amang ug uban pa mao ang ilang gipasiugdahang paugnat sa kusog nga naglakip sa basketball ug uban pa.

Si Sitoy miingon nga gipili nila ang dakbayan sa Mandaue diin himoon ang maong mga kalihokan sanglit sentro man kini sa tanang dapit dinhi sa lalawigan sa Sugbo.

Gitataw usab niya nga nag-una usab ang dakbayan sa Mandaue sa paghugpong sa mga adunay kabilinggan sa panglawas gikan sa 27 ka barangay busa nagsilbi kining modelo sa ubang dapit sa lalawigan sa Sugbo.

Si Mayor Cortes sa iyang pagpamulong mipasabot nga ubos sa gipatumang balaod kun Magna Carta for PWD sa nasud, nga ang mga tawo nga adunay kabilinggan sa panglawas makapahimulos sa 20 porsento nga diskuwento sa plitehan sa mga sakyanan sama sa barko, ayroplano ug hangtod na sa mga bus ug PUJ ug bisan sa ilang pagpalit og pagkaon, tambal o kaha sa pagsulod og mga kalingawan ug uban pa nga matang sa mga serbisyo.

Matud pa ni Cortes nga kasamtangang gipahimuslan sa mga tawo nga adunay kabilinggan sa panglawas ang purchase booklet nga gihatag gikan sa kagamhanan sa dakbayan.

Si Michael Allan Pelago nga maoy regional president sa PWD nga nahinabi sa Banat News miingon nga ang mga programa nga gipasiugdahan sa kagamhanan maoy nakahatag kanila og dugang kalig-on sa ilang pagpakabuhi bisan pa sa gihambin nilang kakulian sa panglawas.  (BANAT NEWS)