Prosecutor mibasura sa hangyo ni Santos

CEBU, Philippines - Bisan sa hangyo ni Bella Ruby Santos ug sa iyang uyab nga British national nga si Charles Griffiths nga di ipadayon ang kaso batok kanila, ang Provincial Prosecutor’s Office nagpabilin sa ilang baroganan.

Kini pinaagi sa pagbasura ni Acting Provincial Prosecutor Joseph Berciles sa motion for reconsideration nga giduso sa kampo ni Santos tungod sa ka kuwang niini og merito.

Ang joint-resolution sa three-man panel nga gilangkoban nila ni Prosecutor Anabelle Robles, Jose Edwin Renegado ug Maria Luisa Ong giaprobahan ni Berciles.

Matud ni Berciles nga ang motion for reconsideration nga giduso sa kampo ni Santos walay bag-ong argumento o mga ebidensiya sa unod niini nga makatarog sa ilang ulahing lagda. “The arguments set forth in the instant Joint Verified Motion contain no new and substantial matters which would merit a reconsideration of their resolution. The issues raised have been exhaustively discussed, and take into consideration by the panel”, tipik sa joint resolution.

Ang panel midugang nga ang motion for reconsideration nga giduso sa abogado nila ni Santos nga si manlalaban Rameses Villagonzalo usa ka dismissible tungod kay nakalapas kini sa basic rules sa procedure human si Villagonzalo giingong napakyas pagpadala og kopya sa maong motion ngadto sa abogado sa kampo ni Renante Pique ang amahan ni Ellah Joy ang 6-anyos nga bata kinsa gidagit ug gipatay.

Si Villagonzalo mibutyag sa The Freeman, ang igsuong pamantalaan sa Banat News nga nakapakugang kanila ang pagbasura sa giduso nilang motion for reconsideration tungod kay gilauman nila ang reversal sa kaso. (BANAT NEWS)