74-anyos gipusil sa ulo sud sa balay patay

CEBU, Philippines - Patay ang usa ka lolo human gipusil sa wala mailhing tawo samtang nanglimpiyo sulod sa ilang balay niadtong Biyernes sa alas-7 pasado sa gabii didto sa sitio Katambak sa barangay Sto Niño sa dakbayan sa Toledo.

Si Sario Candole Salapa, 74, residente sa maong lugar naabtan sa kapulisan nga naglunang sa kaugalingong dugo ug patay diha dayon human nakaangkon og usa ka samad pinusilan sa ulo.

Sa imbestigasyon nila ni SPO2 Dante Talandron, PO3 Peter Cuanso Jr., PO3 Gerardo Taboada ug PO3 Leo Susvilla sa Toledo Police station nagbutyag subay sa giasoy kanila sa anak babaye nga si Cheryl, nagluto siya sa ilang panihapon niadtong higayona samtang ang iyang amahan naglingkod sulod sa balay ug nagkalingaw limpiyo sa pultahan.

Apan kalit siyang nakadungog og usa ka lanog nga buto sa armas nga anaa ra sa duol ug dihang iyang gisusi nagbuy-od na ang iyang amahan nga dunay daghang dugo sa ulo.

Ang kapulisan nakakuha og usa ka kabhang sa .45 nga kalibre sa armas nga gituohang maoy gigamit sa wala mailhing kriminal.

Si SPO4 Gil Lastimosa sa Toledo Police Station nga nahinabi sa Banat News miingon nga mohimo pa sila og lawom nga imbestigasyon alang sa maong kaso.  (BANAT NEWS)