CEBU, Philippines - Miluwat na og warrant of seizure and detention (WSD) ang buhatan sa Bureau of Customs Port of Cebu (BOC-POC) sa barko ug sa petrolyong gituhoan nga ilegal nga gipayuhot dinhi sa Sugbo gikan sa nasud sa Indonesia.
Si Cebu Customs Collector Atty. Ronnie Silvestre miluwat sa maong kamandoan batok sa Motor Tanker M/T Petrolino 1 ug sa iyang karga nga 3,005 litros nga diesel nga anaa gidunggo sa Labogon dakbayan sa Mandaue.
Sa taho ni Coast Guard, Commander Rolando Punzalan Jr. ngadto sa BOC kini mihangyo nga imbestigahon ang maong motor tanker nga nagkarga og petrolyo nga walay dokumentong napakita.
Nagduda ang mga awtoridad nga smuggled ang maong petrolyo ug ilaha na kini karong gikuhaan og sample alang sa laboratory test ngadto sa Manila .
Matud pa ni Punzalan ilang nasubay nga gikan ang maong tanker sa dakbayan sa Naga sa lalawigan sa Sugbu ug maoy midawat sa kargang petrolyo gikan sa usa ka Indonesian tug boat nga “Buleleng” nga nagkarga sa maong petrolyo gikan sa gawas sa nasud ug midunggo sa pantalan sa Naga.
Gumikan niini si Cebu Customs Police District Commander Capt. Isidro Estrera uban sa iyang mga sakop mihimo ug pakisusi niini ngadto sa Naga ug sa Labogon.
Giingong nakalapas sa Section 2530 (a)(f)(g) sa Tariff and Customs Code of the Philippines (TCCP) ang maong mga barko. Gipasabot ni Silvestre miluwat siya og WSD aron kahatagan og kahigayonan ang tag-iya sa maong mga barko nga makapakita sa mga papeles nga naglegalisar sa maong shipment.
Ang WSD gidawat usab sa kapitan sa MT Petronilo nga si Capt. Manolo Arawe aron kini kasamtangang dili makalawig samtang nagpadayon ang imbestigasyon sa BOC. - BANAT NEWS