CEBU, Philippines - Usa ang patay ug duha ang naangol sa dihang ang usa ka motorsiklo nga gimaneho sa hubog midasmag sa usa ka tigulang lalaki sa miaging alas-8 sa gabii didto sa sitio Sangi sa barangay Madredijos sa lungsod sa Alegria.
Si Rolando Balbuena nagpuyo sa sitio Sangi, dead on arrival (DOA) na sa Reinhard Wertgen Memorial Hospital tungod sa grabeng kadaut sa iyang ulo ug kalawasan.
Samtang ang naangol mao sila si Elpidio Javierto, 62 ug Jose Dicdican, 62, pulos nagpuyo sa maong lugar.
Si SPO1 Arnold Omaña sa Alegria Police Station nga nahinabi sa Banat News pinaagi sa telepono nagkanayon gikan namista sila si Dicdican ug Balbuena sa sitio Cotcoton sa barangay Sta. Felomina.
Matud ni Omaña pulos nakainom sila si Dicdican ug Balbuena nga namauli sakay sa motorsiklo nga gimaneho ni Dicdican ug kusog nga nagpadagan subay sa national highway. Apan paghiabot sa nahitaboan wala makabantay si Dicdican nga milabang si Javierto tungod usab sa kangiob sa maong dapit ug napunggit kini samtang sila nangalabay.
Ang tulo daling gitabang sa mga residente ug sa miresponding kapulisan ug gidali pagdala sa nahisgutang tambalanan apan si Balbuena nga mao gyud ang nagrabehan gideklarar sa doktor nga patay daan sa wala pa kini maabot.
Samtang si Dicdican nga grabe usab ang kahimtang tungod sa bun-og sa kalawasan ug ulo daling gibalhin sa tambalanan dinhi sa dakbayan sa Sugbu samtang nagpabilin lang sa Rienhard Wertgen Memorial Hospital si Javierto. - BANAT NEWS