Duna nay Sugbuanong nag-same-sex marriage

CEBU, Philippines - Masaligon ang tibuok Artsediyosisis sa Sugbu nga dili mahitabo dinhi sa Sugbu ang same-sex weddings nga gipahigayon sa usa ka Protestant Church didto sa Baguio City.

Apan usa sa pundok sa ‘third sex’ dinhi sa Sugbu ang mibutyag nga duna nay mga Sugbuanon nga same-sex nga nagpakasal ngadto sa Metropolitan Community Church .

Wala hinuon mohatag pa og dugang impormasyon ang maong pundok kun kanus-a kini nahitabo apan siya nagkanayon nga dunay paresan nga pulos babaye ug duna say pulos mga lalaki.

Nasayran nga init karon ang maong isyu sa kaulohan dihang ang Metropolitan Community Church (MCC), nga usa ka Protestant Church nga nagbase sa Quezon, Makati ug Baguio City mipahigayon og mass wedding sa same sex.

Dali kining giuwan og pagsaway gikan mismo sa Catholic Bishops Conference of the Philippines (CBCP) ug miabot pa sa punto nga ilang patangtangan og lisensya ang mga pastor nga mihimo sa maong seremonyas.

Susama ra usab ang baruganan sa mga kaparian dinhi sa Sugbu kinsa mipahugot usab sa ilang baruganan sa pagpasupak sa pagpakasal sa duha ka lalaki o duha ka babaye nga ilang giisip nga usa ka dakung sala sa mata sa tawo ug sa Ginoo.

Si Cebu Archdiocesan Episcopal Vicar Msgr. Esteban Binghay nagkanayon nga girespeto nila ang mga sakop sa third sex, apan dili nila mahimong dawaton ang kamatuoran sa pagpakasal tali sa mga sakop niini ug wala kini legal nga basihan.

“Ato silang respetahan, nalahi sila sa normal ug sa orientation, pero if pagpakasal na ang hisgutan wala kini legal basis,” matud pa ni Binghay sa pakighinabi sa Banat News.

Bugtong ang pagpakasal tali sa usa ka lalake ug usa ka babaye ang giila sa Family Code of the Philippines, lahi sa mga nahitabo didto sa Estados Unidos diin hinay-hinay nang gipatuman ang same-sex marriage.

“Daku gyud ning kalapasan, as we all know sex is for procreation, lahi naman ilang gusto kay himuon naman nilang sex for recreation,” dugang pa ni Binghay.

Giklaro usab sa Monsignor nga gawas sa Simbahang Katoliko, supak usab sa same sex marriage ang pipila ka mga Christian Church ug ang relihiyong Islam. Samtang ang coordinator sa Lesbian, Gay, Bisexual and Transgender (LGBT) Community nga si Mikay Dumaboc misaysay dinhi sa Banat News nga iyang panghinaut nga himuon unta nga legal sa nasud ang same sex marriage.

“Hagbay naman na namo nga gihangyo sa kongreso pero maglisod lang gyud kay kasagaran man gud sa mga kongresista kay katoliko,” matud pa ni Dumaboc.

 “Bisan dili pa na legal, ang importante nga dunay commitment ang usa ka relasyon. Ang naandan man gud karon kay nisubay ra sa ilang tradisyon sa religion.  - BANAT NEWS