Usa ka tuig nga bata patay sa aksidente

CEBU, Philippines - Patay ang usa ka tuig kapin nga batang babaye human kini maligsi og sakyanan kauban ang iyang ginikanan dihang natumba ang motorsiklo nga ilang gisakyan nasaghiran og laing sakyanan diha sa highway sa barangay Damolog lungsod sa Sogod niadtong Miyerkules sa alas 5:20 sa buntag. Ang namatay mao ang usa ka tuig kapin nga bata nga si Jana Angela Nalzaro, ug naangol usab ang iyang ginikanan nga sila si Jovanie Nalzaro, 27, ug inahan sa bata nga si Aiza Nalzaro, 22. Samtang ang nakadasmag nila mao ang Toyota Revo nga dunay plaka nga GTU-773 nga gimaneho ni Alberto Misa, 47, taga Calape lungsod sa Daanbantayan.

Matud ni PO2 Julius Banguardia sa Sogod Police Station dihang nahinabi sa Banat News nga sa imbistigasiyong ilang gihimo ang motorsiklo ug ang nakasaghid nga sakyanan pulos paingon sa direksyon sa siyudad sa Sugbo.

Apan pag-abot sa nahisgutang lugar nag-una ang motorsiklo ug dihay usa ka sako nga basura nga natagak gikan sa de karga nga mangumprahay og scrap iron hinungdan nga gilihayan kini ni Nalzaro.

Naatol nga kusog ang pagpadagan sa Toyota Revo ug aksidenteng nadasmagan ang motorsiklo nga milihay sa sako hinungdan sa pagkalamba sa motorsiklo ug nalabay ang maong pamilya.

Ang bata didto nalagpot pabor sa sakyanan ug napasok sa ilawom ug naguyod og pipila ka metros sa sakyanan una pa mohunong ang sakyanan. Ang mga estambay pagkakita sa bata sa ilawom daling mihulbot niini ug midala sa pamilya ngadto sa Juan Dosado Hospital sa maong lugar. Apan ang bata gideklarar kini nga dead on arrival tungod sa kagrabe sa nahiagumang kadaot sa lawas.

Ang drayber nga nakadasmag mitahan dayon sa kapulisan ug nabalhog na sa karsel samtang gihikay na ang kasong ipasaka batuk niya.  - BANAT NEWS