P3.2M gibubo sa Kapitolyo sa Madridejos

CEBU, Philippines -  Kapin sa P3.2 milyones ang gibubo sa lalawigan sa Sugbu alang sa tulo ka mga barangay sa lungsod sa Madridejos alang sa katukoran sa duha ka bag-ong edipisyo sa tunghaan ug mga bag-ong computers.

Gawas pa niini nangapod-apod usab og mga school supplies sa mga tinun-an sa Mancilang Primary School .

Atol sa hamubo nga programa, personal nga gihatag ni Gov. Gwendolyn Garcia ang tseke nga mobalor sa usa ka milyon ka pesos ngadto kang Madridejos mayor Salvador dela Fuente isip hinabang alang sa road concreting project sa nahisgutang lungsod.

Laing kantidad nga gitunol sa gobernadora mao ang 740 mil ka pesos alang sa duha ka lawak saringanan nga school building ngadto sa San Agustine National High School, laing 730 mil pesos alang gihapon sa duha ka classroom school building sa Tabagak Elementary School.

Atol sa pagduaw sa gobernadora sa Madridejos gisubhan usab niya uban ni 4th district Cong. Benhur Salimbangon ang road concreting project sa barangay Baod ug ang bag-ong natukod nga multi purpose building.

Si Salimbangon maoy naghatag og pundo alang sa maong proyekto nga mobalor og P3.5 milyones.

Si dela Fuente nagpasalamat sa lalawigan ug kang Salimbangon tungod sa maong proyekto. (BANAT NEWS)