CEBU, Philippines - Ang konseho sa dakbayan sa Talisay miawhag sa kapolisan sa siyudad nga pahugtan ang ilang kampaniya batok sa ginadiling drugas nga maoy usa sa dakong problema sa siyudad.
Gawas niini ang konseho nag-awhag usab sa kapolisan nga makiglambigit sa mga kapitan sa barangay aron mapalig-on ang ilang kampaniya. Niadtong Martes sa regular nga sesyon sa konseho sa siyudad giaprobahan ang Resolusyon Numero 2011-22-11 nga gipangamahanan ni Bise Mayor Alan Bucao, chairman sa committee on public order, safety, traffic management and public utilities.
Ang mga tipik sa resolusyon ni Bucao nagkanayon nga “the present drug situation in the city has apparently increased and is seen as one of city’s biggest problem”.
“Recently, the Cebu City Police Office was being awarded as the distinguished police office for the entire Central Visayas for having confiscated the largest haul of illegal drugs”.
“The achievement of the CPPO should encourage the City of Talisay Philippine National Police to intensify campaign against the illegal trade”, ang laing tipik sa resolusyon.
Si Chief Inspector Eddie Recamara ang officer-in-charge (OIC) sa Talisay City Police Station (TCPS) sa pakighinabi sa Banat News kagahapon nagkanayon nga ang problema sa ginadiling drugas dili lang sa Talisay kundili sa lukop nasud.
Matud niya nga kanunay ang ilang pagpaniid sa mga operasyon sa ginadiling drugas sa Talisay ug gani sobra na sa 20 ka tawo nga naglangkob sa pusher, user ug nagmentenar og mga drug den ang ilang nasikop ug napasakaan na og kaso ngadto sa piskaliya sukad sa iyang paglingkod isip OIC sa TCPS sukad niadtong Mayo 2, 2011.
Gibutyag usab ni Recamara nga aron mapalig-on ang ilang kampaniya batok sa ginadiling drugas sa Talisay niining bag-o lang gitukod niya ang City Anti-Illegal Drugs Special Task Force (CAIDSOTF) nga gilangkoban sa mga bag-ong mga polis. (BANAT NEWS)