CEBU, Philippines - Nahabwa ang tinae ug ubang ilawom sa ginhawaan sa usa ka babaye human kini hiligsi sa 10 wheeler truck nga gimaneho sa drayber nga hubog didto sa barangay Guinsay, siyudad sa Danao alas 5:15 sa hapon niadtong Martes.
Samtang ang bana ug dos anyos nga anak sa maong babaye nangaangol usab ug nadala sa tambalanan.
Ang biktima mao si Analiza Batulan, 38, minyo, samtang ang iyang banang naangol mao si Eduardo Batulan, 49, ug ilang dos anyos nga anak lalaki nga si Ian Paul. Ang drayber sa 10 wheeler Mitsubishi fuso truck nga kargado sa softdrinks nga nakaligis sa babaye mao si Floreno Molena, minyo, 50, nga taga barangay Basak lungsod sa Catmon.
Si SPO1 Renante Manulat, traffic investigator sa Danao City Police mibutyag sa Banat News nga ang pamilyang Batulan nagpaingon sa siyudad sa Sugbo nga gisunod sa 10 wheeler truck.
Pag-abot sa Guinsay kalit nga ni-overtake ang trak sa traysikol nga gimaneho ni Marvin Ironico unya nasaghiran kini ug nawad-an sa preno ang traysikol ug mibangga kini sa nag-parking nga motorsiklo.
Apan ang 10 wheeler truck nagpadayon sa iyang dagan hangtod nga gumikan malagmit sa kalasbag sa drayber nasaghiran na usab niini ang motorsiklo nga gisakyan sa mga biktima.
Nalamba ang motorsiklo sa karsada ug si Analiza nahalabay sa taliwala sa karsada hinungdan nga napigsat ang lawas ug habwa ang iyang tinae, atay ug uban pang ilawom sa ginhawaan dihang nalatayan sa mga ligid sa trak, samtang ang iyang bana ug ang gamay nga anak nahalabay ngadto sa daplin sa karsada hinungdan nga igo lang kining nangapangos ug nangabun-og.
“Grabe gyud sir, 1st time to naku nga nakarespondi og ingon ato nga hitabo kay sagad namo marespondihan mabuak man ang ulo, kaning hitabua lahi, na-separate ang renyon, dunay portion sa iyang atay nga buwag hasta ang tinae nahabwa na gutay-gutay gyud,” dugang asoy ni SPO1 Manulat.
Matud ni SPO1 Manulat nga human sa hitabo misirit pa gyud ang drayber sa trak ug didto na mohunong sa pag-utlan sa barangay Guinsay ug gibilin ang sakyanan niini dayon mideretso sa buhatan sa kapolisan aron motahan sa iyang kaugalingon.
Ang drayber nagtingkagol na karon sa karsel human gihikay na ang kasong ipasaka batok kaniya ilabi na nga nasuta sa liquor test nga positibo kini sa illimnong makahubog. (BANAT NEWS)