CEBU, Philippines - Sobra usa ka gatus ka libo ka pesos ang nasakiyo sa duha ka nagtaptap nga tulisan nga mitulis sa mga kawani sa usa ka softdrinks company samtang nag-deliber sa ilang mga produkto sa mga suki niini didto sa barangay Lipata lungsod sa Minglanilla niadtong Martes sa ala 1:45 sa hapon.
Ang biktima mao si Jennifer An Jarantilla, 34 anyos, minyo, nagpuyo sa Happy Valley siyudad sa Sugbo ug account developer sa Coca Cola Bottlers Inc. ug ang kauban niini nga si Sannie Bocar, 37, taga Linao siyudad sa Talisay ug delivery boy sa maong kompaniya.
Ang suspek gihulagway lang sa mga biktima nga duha ka hamtong nga lalaki nga pulos nagsul-ob og close helmet nga kolor puti ug itom nga sakay og Honda XRM nga motorsiklo kolor blue ug armado og kalibre .45 nga armas.
Matud ni PO1 Evie Espina, desk officer sa Minglanilla Police dihang nahinabi sa Banat News, ang mga biktima mihunong sa maong lugar ug si Bocar mihatud og softdrinks sa tindahan.
Sa pagbalik na sa sakyanan ni Bocar kalit nga miabot ang duha ka tulisang nagmotor ug gipangtionan ang mga biktima ug mideklarar og tulis, daling gikuha sa mga tulisan ang koleksyon ni Bocar nga P3 mil ug gisunod og kuha ang B-mobile nga usa ka tracking device sa kompaniya nga mokantidad og P78 mil, duha ka cellphone.
Pagkahuman nisirit ang mga suspek sakay og balik sa ilang motorsiklo paingon sa wala matino nga direksiyon. Ang duha igo nalang pagdangop sa kapolisan.(FREEMAN)