Mitagod sa uyoan nadakpan

CEBU, Philippines -  Nasikop sa mga tanod ug konsehal sa barangay Tagba-o sa dakbayan sa Sugbu ang mitagod-tagod patay sa iyang uyoan niadtong Domingo sa hapon sa barangay Magsaysay sa lungsod sa Balamban.

Si Roldan Bunghanoy, 27, nakuhaan og usa ka kutsilyo sa iyang posisyon sa duha ka tanod ug ni konsehal Elmer Tabal sa Tagba-o diha sa balay sa ig-agaw sa suspek.

Si Bunghanoy maoy gipasanginlang mitigbas sa iyang uyoang si Bernardo Panit, 62, niadtong Domingo samtang ang biktima gikan sa ‘tabo’ niadtong Domingo sa barangay Tagba-o.

Si Bunghanoy gi-turnover sa kapulisan pinangulohan ni SPO1 Godofredo Piquero sa Cebu City Public Safety Battalion (CCPSB) ug gidala sa Cebu City Police Office (CCPO).

Ang suspek mibutyag sa mga tigbalita nga nag-inom sila sa biktima ug iyang ig-agaw nga si Julito Calan ug pagkahuman namauli. Apan giingong miuna og lakaw ang suspek ug nabiyaan ang biktima ug si Calan.

Pag-abot sa nahitaboan kalit nga mibutho ang suspek ug walay daghang pangutana gitigbas ang uyoan makadaghang higayon sa kalawasan.

Sa dihang gipangutana sa mga sakop sa media si Bunghanoy nganong iya kadtong nahimo ang pagtigbas sa iyang uyoan kini igo lang nangambot apan kini mipadayag nga ‘dagmalan’ ang biktima ngadto kaniya.

Siya mipasangil nga niadtong milabay’ng tuig gibinat sa biktima ang iyang kilid ug gipuspusan siya niini og kahoy tungod sa iyang pagpanigarilyo.

Tungod niini nagduda ang kapolisan nga panimalos ang motibo sa krimen. (BANAT NEWS)