Mikawat sa P700 mil nga alahas ug kuwarta tiklo

CEBU, Philippines -  Usa ka suspetsadong kawatan nga mikawat sa P700 mil ka mga alahas, kuwarta ug uban pang mga butang gikan sa balay nga iyang gilungkab nasikop sa kapolisan sa dakbayan sa Talisay didto sa sitio Hollow Block, barangay Lagtang, sa nahisgutang siyudad kagahapon sa buntag.

Ang nadakpan mao si Rodel Ecoña, 19, residente sa sitio Hollow Block .

Nasakmit sa kapolisan gikan sa mga kamot sa maong suspetsado nga gituohang mao ang E 95 nga cellular phone nga nagkantidad og P5,000, Samsung Netbook nga nagkantidad og P30 mil, Ipod, ug uban pa nga gipanag-iya ni Teresita Smith taga Santa Teresa 2, Ramona Village, barangay San Isidro sa maong siyudad.

Ang nahisgutang mga butang maoy sulod sa usa ka Mitsubishi digital bag nga kolor blue sa biktima.

Nasayran nga wala diha sa balay ang biktima dihang misaka ang suspetsado ug nanglungkab sa mga aparador ug gikawat ang mga butang sa biktima.

Si SPO3 Daniel Tarucan mibutyag sa mga tigbalita kagahapon nga ang nangulo sa ilang operasyon mao si Inspector Hugo Rio Ipong.

Gibutyag usab ni Tarucan nga si Ecoña nasikop na kaniadto sa kapolisan sa Talisay sa kasong pagpangawat dihang nagpanuigon pa kini og 17-anyos.

Ang modus sa grupo sa suspetsado mao ang magpasangil nga mga mamunitay og basura nga magkabulingit lang unya mosaka sa balay nga walay tawo. Kagahapon si Ecoña gikatakdang pasakaan og tukmang kaso sa kalapasan nga iyang nabuhat. (BANAT NEWS)