Lalaki naguroy og 100 metros sa awto patay

CEBU, Philippines -  Nagkagidlay ang kalawasan sa patay’ng lawas sa usa ka 31-anyos nga ulitawo human kini maguyod og gibanabanang 100 metros dihang naligsan sa mi-hit and run nga awto sa gisakyan niining motorsiklo sa sitio Kabulihan sa barangay Magdugo siyudad sa Toledo niadtong Domingo sa alas 11:30 sa gabii.

Ang biktima mao si Kirk Al Abalde, 31, molupyo sa Gen. Climaco sa siyudad sa Toledo , samtang ang drayber sa Ford Mustang nga sakyanan mao si Romeo Almendras, 46, taga dalan Escario siyudad sa Sugbo.

Ang sakyanan nakarehistro sa Ad-ken Trading dunay address nga 485 Royal B Terrace U.N. Avenue Ermita St. District, National Capital Region.

Matud ni SPO2 Lorenzo Mahilum, traffic investigator sa Toledo City Police dihang nahinabi sa Banat News nga ang biktima gikan sa lungsod sa Pinamungajan paingon sa barangay Magdugo sa Toledo City .

Samtang ang nakadasmag kaniya paingon usab sa Pinamungajan apan pag-abot sa kurbadahong bahin sa maong lugar mikawat sa pikas linya ang maong awto ug naatol nga maoy pagsugat nila sa motorsiklo ug aksidenteng nagkadumbolay ug nalamba ang motor.

Apan way swerte ang biktima tungod kay daw gisuyop pasulod sa ilawom sa maong awto ug naguyod sulod sa gibanabanang 100 metros ang gilay-on ug pagkahuman gibiyaan lang sa sakyanan.

Ang mga tawo na nga nakakita maoy mitabang sa nagkadugo nga biktima nga nangapaslot ang panit ug kalawasan nga nadahik sa semento ug gidala kini didto sa Toledo City District Hospital apan namatay kini sa paglabay sa pipila ka gutlo.

Daling mipahigayon og follow-up operation ang kapulisan ug didto ilang na-trace ang maong awto ug drayber niini ingon man ang nakarehistro nga tag-iya niini.

Niadtong Lunes sa hapon nadakpan si Almendras nga maoy giingong drayber sa maong sakyanan dinhi na sa dakbayan sa Sugbo.  (BANAT NEWS)