2-Anyos gituok tungod way ikapusta sa Jai-Alai

CEBU, Philippines -  Usa ka 2-anyos nga batang lalaki ang gituok sa iyang kaugalingong amahan kinsa mikulata usab sa 26-anyos nga inahan sa bata tungod sa kasuko nga wala mahatagi sa gipangayong kwarta nga ipusta sa jai-alai.

Ang pagpangabuso nahitabo diha sa barangay Bagtik lungsod sa San Remegio niadtong Lunes sa alas 6:00 sa gabii nga miresulta sa pagkabun-og sa mga biktima (pangalan gipugngan sa Banat News).

Samtang ang gitumbok nga responsable mao ra usab ang 28-anyos nga kapuyo sa ginang.

Matud ni PO3 Joejohnnesky Ynot sa San Remegio Police Station dihang nahinabi sa Banat News nga gikan sa iyang trabaho dinhi sa siyudad sa Sugbo ang ginang nianang tungura.

Apan sa iyang pag-abot sa balay gisugat kini sa suspek ug nangayo og P10 kay aron iyang ipusta og jai alai apan gibalibaran kini sa biktima.

Tungod niini pwerteng sukoa sa suspek ug nanghagis dayon migawas sa ilang balay ug mipunit og mga bato ug gibato ang atop sa ilang balay hinungdan nga migawas ang biktima aron kini badlungon.

Apan ang suspek mibalik og sulod sa balay ug didto gituok ang ilang 2-anyos nga anak dungan sa pag-ingon “tablahon tani tanan, di ko molakaw kun dili nako madala ang bata,” dugang asoy sa suspek.

Ang ginang nga naluoy sa iyang anak milayog sa suspek aron pahunongon sa pagtuok sa ilang anak apan mao na usab kini ang giatubang ug gitamparos ug pagkahuman gidabudabuhan og kulata hangtud nga nabun-og.

Ang mga silingan nga wala makaagwanta sa gibuhat sa suspek daling nangayo og tabang sa barangay hinungdan nga gidakop sa mga tanod ang suspek ug gihatud sa buhatan sa kapulisan diin kini gibalhog.

Kasong kalapasan sa Akta Republika 9262 kon Violence Against Women and Children ang gihikay nga kaso batok sa suspek.

Apan paglabay og pipila ka oras mipatin-aw ang biktima ug nakahukom nga dili mohinayon sa pagpasaka og kaso tungod sa ilang anak.(EIM) (BANAT NEWS)