Babayeng tigpayuhot og nubain sikop
CEBU, Philippines - Usa ka babaye nga gidudahang tigpayuhot og nubain nasikop atol sa buy bust operation sa mga sakop sa City Intelligence Branch (CIB) sa Cebu City Police Office (CCPO) didto sa sitio San Vicente, barangay Bulacao siyudad sa Sugbo, sa miaging gabii.
Ang buy bust gipangulohan ni Insp. Jul Mohammad Jamiri, deputy sa CIB inabagan sa mga sakop sa Investigation and Detective Management Branch (IDMB) ug Barangay Peacekeeping Action Team (BPAT).
Ang suspetsado giila nga si Daisy Agustin Torres, 47, dalaga, ug residente sa maong lugar.
Si Torres nasikop human dawata niini ang P600 gikan sa usa ka polis nga nagpaka-aron ingnong mopalit og tulo ka ampule. Dihang girikisa ang iyang lawas, nakasakmit pa ang mga otoridad og laing 30 ka ampule sa ginadiling druga ug gibawi dayon sa kapolisan ang P600 nga nadawat sa suspetsado.
Matud ni SPO1 Jeoffrey Diola sa CIB nga sa wala pa nila himoa ang operasyon ila pang gipanid-an og duha ka semana ang kalihokan sa suspetsado.
Giklaro ni Diola nga subay sa ilang gihimong pakisusi ilado na kaayo si Torres sa ilang dapit nga tigpayuhot og drugas nga nubain.
Kalapasan sa Section 11 ug 15 sa Republic Act 9165 ang giandam nga kaso sa kapulisan batok kang Torres.
Si Torres gitanggong karon sulod sa detention cell sa CCPO sa Gorordo Avenue ning siyudad. (BANAT NEWS)
- Latest
- Trending
