CEBU, Philippines - Usa ang patay ug tulo ang mga naangol dihang nagkabanggaanay ang ilang gipangsakyang motorsiklo ug ang usa sa mga biktima napasok sa ligid sa trak de karga nga nagsunod diha sa National Highway sa Velpal Subdivision barangay Pakigne lungsod sa Minglanilla kagahapon sa alas 12:30 sa sayong kaadlawon.
Ang namatay mao ang angkas nga si Simaco Villarta, 33, taga lungsod sa Barili, samtang naangol mao ang nagmaneho sa gisakyan niining motorsiklo nga si Ernie Lopez, 27, taga barangay Guadalupe sa dakbayan sa Sugbo.
Naangol usab ang drayber ug angkas sa gikadinasmagay niining laing motorsiklo nga sila si Domingo Alforque Jr., 30, maoy nagmaneho sa motorsiklo ug taga barangay Tulay Minglanilla ug angkas niini nga si Chariban Cruz, 20, nagpuyo ra sa maong dapit.
Mitahan hinuon sa kapolisan ang drayber sa 6-wheeler cargo truck nga nakaligis patay ni Villarta nga mao si Ramonitor Donaire nga taga barangay Sayaw lungsod sa Sibonga.
Matud ni PO2 Abelardo Beton sa Minglanilla Police dihang nahinabi sa Banat News subay sa imbestigasyon, si Alforque paingon sa habagatan gikan sa siyudad sa Sugbo samtang sila si Lopez kasugat niini nga direksiyon gikan sa habagatan paingon sa siyudad sa Sugbo.
Apan pag-abot sa maong lugar pulos nagpakusog og dagan ang duha ka motor ug aksidenteng nagkasinaghiray maong sila nangalamba ug natumba. Ang angkas ni Lopez nga si Villarta nalabay taliwala sa karsada ug naatlan nga maoy pag-agi sa maong trak ug napasok kini sa ilawom ug naligsan sa mga ligid hinungdan sa iyang kamatayon.
Samtang ang duha ka drayber sa motor ug ang babayeng angkas gidali pagdala sa Minglanilla District Hospital apan si Villarta gideklarar nga dead on arrival (DOA). Si Donaire boluntaryong mitahan sa iyang kaugalingon sa buhatan sa kapulisan samtang gihikay ang kasong ipasaka batok niya. (BANAT NEWS)