Talisay vendors misumbong kang P.Noy

CEBU, Philippines -  Nakahigayon kagahapon ang pipila ka mga vendors sa Tabunok Public Market sa dakbayan sa Talisay sa pagsumbong kang Presidente Benigno Simeon Aquino III kabahin sa gikatakdang pagbalhin kanila ngadto sa bag-ong Lagtang Public Market.

Atol sa report sa TV Patrol Central Visayas, si Aquino nakiglamano sa publiko atol sa iyang pagtambong sa inugurasyon sa 2X100 MG unit sa Korean Electric Power Corporation (KEPCO)-Salcon Power Corporation sa barangay Colon sa dakbayan sa Naga kagahapon.

Diha sa pagpanglamano ni Aquino kalit nga mipabuhagay ang dul-an napulo ka mga vendors sa Talisay ug misumbong kabahin sa nagpaabot nga pagbalhin kanila karong adlawa ngadto sa Lagtang.

Hinuon wala molungtad og dugay ang maong pakighinabi apan adunay usa ka opisyal nga kauban ni Aquino nga gitahasan sa pagkuha sa mga impormasyon kabahin sa reklamo sa mga vendors. Ang mga vendors sa Talisay hugtanong misupak sa plano sa siyudad nga pagbalhin kanila tungod sa kabalakang maapektahan ang ilang kinitaan tungod niini. (BANAT NEWS)