Mga ahente gitulis sa nag-t-shirt og PNP

CEBU, Philippines - Himabaw sa P20 mil ang salapi nga nasakiyo sa usa ka tulisang nagsul-ob og uniporme sa polis gikan sa duha ka mga pribadong ahente sa kompaniya sa lending ug cellphone didto sa dakbayan sa Danao sa miaging buntag.

Si SPO2 Matias Galo sa kapolisan sa maong dakbayan nga nahinabi sa Banat News miila sa mga biktima nga mao sila si Keit Villar Bola, 26, ulitawo, nga kolektor sa Almar Lending, nga taga barangay Tabok, dakbayan sa Mandaue ug Auron John Lacaron, 22, ulitawo, kolektor sa Sun Cellular Company nga taga barangay Looc, dakbayan sa Mandaue usab.

Matud pa ni SPO2 Galo nga si Bola nagsakay sa iyang motorsiklo nianang alas 11:20 sa kabuntagon, paingon sa Poblacion sa Danao, dihang pag-abot niya sa barangay Tabok, usa ka motorsiklo nga gisakyan og usa ka tawo nga nagsul-ob og itom nga t-shirt nga gimarkahan ang likod og PNP mihunong sa unahan ug gipara ang nahauna.

Sa pagtuo nga sitahon siya basin kun may nalapas siyang balaod sa trapiko, mihunong dayon si Bola.

Apan sa iyang pagkanaog gidul-itan dayon siya sa bugnaw kaayong sumbohan sa .45 kalibreng pistola uban sa pagpahibawo nga tulis.

Walay laing nahimo ang biktiima gawas sa paghatag niini sa iyang koleksyon nga P8 mil.

Diha-diha human madawat ang kuwarta, misirit dayon pahilayo sa maong dapit ang tulisan.

Apan pipila ka minutos, nianang pagka-alas 11:50 sa kabuntagon, human tulisa si Bola, laing tulis na usab ang nahitabo didto sa barangay Taytay, sa mao gihapong dakbayan ug ang gibiktima mao na usab si Lacaron.

Si Lacaron mitug-an sa kapolisan nga samtang nagpadagan siya   sa iyang motorsiklo paingon sa amihanang bahin gikan sa Poblacion, Danao kalit lang mibabag ang usa ka motorsiklo nga gisakyan sa usa ka tawong nagsul-ob gihapon og t-shirt nga itom nga may markang PNP ang likod.

Dayon pagkanaog ni Lacaron, wala na siya makalakaw pa og layo kay gitionan na siya sa .45 kalibreng pistola uban sa pagdeklalar nga tulis, P8 mil gihapon ang koleksyon nga iyang gitunol ngadto sa maong tulisan.  (BANAT NEWS)