CEBU, Philippines - Namatay ang kanhi secretary sa barangay hall sa barangay Lindogon, lungsod sa Sibonga human kini maghikog sulod sa ilang balay niadtong Sabado sa gabii gamit ang usa ka nylon cord nga gihigot sa iyang liog.
Ang naghikog mao si Neri Languita, 36. Ang nakadiskobre sa iyang paghikog mao ang iyang anak nga si Joseph Rey, 13. Gibutyag sa bayong-bayong ngadto sa kapolisan nga nakit-an niya ang iyang amahan nga nagbitay na, kansang pikas tumoy sa pisi nga gihigot sa iyang liog, gigaid sa sagbayan sa ilang lawak.
Dihang nasayran sa ubang miyembro sa pamilya, gidala dayon nila ang wala nay panimuot nga Languita ngadto sa Dr. Deiparine Medical Clinic apan wala na kini makaabot nga buhi sa maong tambalanan.
Sumala sa mga kabanay ni Languita, nga nag-inusara ra sa ilang balay niadtong higayona kay ang iyang asawa ug tulo ka mga anak didto sa balay sa ilang paryente hinungdan nga nakahigayon siya sa paghikog.
Si PO2 Ederlino Bacusmo sa Sibonga Police Station mibutyag nga ang asawa ni Languita bag-o lang miabot gikan sa Malaysia.
Apan wala kini mobutyag kanila kun unsay hinungdan sa paghikog sa iyang bana.
Matud ni PO2 Bacusmo nga sa ilang imbestigasyon, ilang nasuta nga ang magtiayon walay giawayan ug wala usa’y problema.
Gikataho nga si Languita misuway og pangaplay og trabaho human siya moluwat isip secretary sa ilang barangay apan wala kini makasulod og trabaho. Karong adlawa ang mga polis makigkita sa kapitan sa barangay nga si Gloria Recaborda pamasin may makapkap silang kasayoran na may labot sa paghikog ni Languita kansang lawas patay gipa-awtopsiya pa. (WC)(BANAT NEWS)