P2.3M budget sa taxpayers night tukion
CEBU, Philippines - Gipugngan sa konseho sa siyudad sa Sugbo ang kapin sa P2.3 milyones nga gipangayong budget ni City Treasurer Ofelia Oliva alang sa tinuig nila nga Taxpayers’ Night karong Hulyo 15.
Gikatakdang patambungon si Oliva sa executive session karong Miyerkules aron iyang i-esplikar ngadto sa mga konsehal sa detalyadong budget proposal sa maong kalihukan.
Aprubahan lamang sa konseho ang maong budget proposal kung makumbinser kini sa eksplinasyon ni Oliva.
Ang kapin sa P2.3 million nga budget naglangkob sa P700,000 alang sa function room ug pagkaun alang sa 777 ka mga bisita; P655,000 alang sa mga plaque nga ihatag sa mga pasidunggan nga taxpayers; P250, 000 alang sa pagpahimo sa imbitasyon, corsage, giveaways ug uban pa nga panginahanglanon.
Samtang P230,000 sab alang sa lights, sound system ug entablado; P118,000 alang sa nga materyales nga gamiton sa produksyon sama sa teleprompters, confetti ug uban pa; P248,000 maoy igahin sa honorarium alang sa mga tawo nga magdumala sa programa sama emcee, direktor ug uban pa; P60,000 sa pagkuha og dance troupe, orchestra.
Naglain usab og P90,000 alang sa sininang suoton sa 30 ka ushers ug usherettes ingon man usab ang make-up alang sa mga dancing tax collectors; ug P7,200 alang sa pagkaon sa mga sakop sa Special Program for Employment of Students .
Tinuig na nga kalihukan sa siyudad ang Taxpayers’s Night aron pasidunggan ang mga nagbayad og buhis nga maoy rason sa pagpauswag sa ekonomiya sa dakbayan. (BANAT NEWS)
- Latest
- Trending
